«ءمىرجاقىپ. ويان، قازاق!» ۇزدىك تاريحي سەريال
وتاندىق سەريال كونتەنتىنە ارنالعان «Nauryz» ۇلتتىق بايگەسىنىڭ جەڭىمپازدارى ماراپاتتالدى، دەپ حابارلايدى Almaty-akshamy.kz.
«Nauryz» ۇلتتىق بايگەسى اقپارات جانە قوعامدىق دامۋ مينيسترلىگىنىڭ قولداۋىمەن العاش رەت ءوتىپ جاتىر.
بايگەگە 2021 جىلعى 1 قاڭتار – 2022 جىلعى 31 جەلتوقسان ارالىعىندا قازاقستاندىق تەلەارنالاردىڭ ەفيرىنە، YouTube ارناسىندا شىققان سەريالدار مەن شىعارماشىلىق توپتار 13 نوميناسيا بويىنشا قاتىسىپ جاتىر.
«وزدەرىڭىزگە بەلگىلى، ناۋرىز – جاڭارۋ مەن گۇلدەنۋدىڭ، ءوسۋ مەن وركەندەۋدىڭ سيمۆولى. سوندىقتان بۇل ۇلتتىق بايگە وتاندىق سەريالداردىڭ دا وسىپ-وركەندەۋىنە سەپتەسەدى دەپ ۇمىتتەنەمىز. جالپى ەلىمىزدە سوڭعى جىلدارى كرەاتيۆتى يندۋستريا، تەلەسەريالدار قارقىندى دامىپ كەلەدى. ءقازىر بىزدە سان دا، ساپا دا ارتىپ كەلەدى، قاراجات جاعىن دا كوبەيتۋدى قاراستىرىپ وتىرمىز. ءقازىر وتاندىق سەريالدار ىشكى جانە سىرتقى نارىقتا ۇلكەن سۇرانىسقا يە بولىپ وتىر. بۇرىن ءۇندىنىڭ «كەلىنىنە» تەلمىرەتىن كورەرمەن ءقازىر ءوزىمىزدىڭ «كەلىنجان» مەن «اپپاق كەلىندى» كورەدى»، - دەدى اقپارات جانە قوعامدىق دامۋ ءمينيسترىنىڭ مىندەتىن اتقارۋشى دارحان ءقىدىرالى كەشتىڭ اشىلۋىندا.
ەڭ الدىمەن «ۇزدىك تاريحي سەريال» اتالىمىنىڭ جەڭىمپازدارى ايتىلدى.
ءادىلقازى القاسىنىڭ شەشىمىمەن بۇل ماراپاتتى Qazaqstan ۇلتتىق ارناسى تۇسىرگەن «ءمىرجاقىپ. ويان، قازاق!» سەريالى جەڭىپ الدى.
بۇل جۇلدەگە سونىمەن بىرگە «قانىش. قازىنا»، «قىزىل جەبە»، «مانشۇك» تالاسقا تۇسكەن ەدى.
«ۇزدىك درامالىق سەريال» نوميناسياسىندا دا Qazaqstan ۇلتتىق ارناسىنىڭ «اقجاۋىن» تۋىندىسى ۇزدىك اتاندى.
مۇندا «بىرگە بول»، «راۋزا. ساكۋرانىڭ گۇلدەۋى»، «شانحاي» تەلەحيكايالارى شورت-تىزىمگە ەنگەن بولاتىن.
كورەرمەن كوزايىمىنا اينالعان «كەلىنجان» «ۇزدىك كومەديالىق سەريال» اتاندى. شورت-تىزىمگە «باجا»، «كۇيەۋ بالا»، «پاترۋل» تۋىندىلارى دا ەندى.
«ۇزدىك ۆەب-سەريال» نوميناسياسىندا «اپپاق كەلىن»، «وينا»، Serjan Bratan، «5:32» سەريالدارى ب ا ق سىنادى.
ناتيجەسىندە Salem Social Media تۇسىرگەن Serjan Bratan وزىپ شىقتى.
ايتا كەتەيىك، جەڭىمپازدارعا NAURYZ ارنايى مۇسىنشەسىمەن بىرگە 1 ميلليون تەڭگە كولەمىندە سىياقى تابىستالدى.