قازاقستان گەرمانياعا تاعى دا مۇناي جونەلتپەك

«قازترانسويل» اكسيونەرلىك قوعامى ناۋرىزدا گەرمانياعا كەلەسى 20 مىڭ توننا مۇناي ءترانزيتىن جۇزەگە اسىرۋدى جوسپارلاپ وتىر.

بۇل تۋرالى اتالعان كومپانيانىڭ باسپا ءسوز قىزمەتى مالىمدەدى، دەپ حابارلايدى Almaty-akshamy.kz.

«قازاقستان رەسپۋبليكاسىنىڭ ەنەرگەتيكا مينيسترلىگى بەكىتكەن مۇنايدى تاسىمالداۋ كەستەسىنە سايكەس «قازترانسويل» اق ناۋرىز ايىندا گەرمانياعا «ترانسنەفت» جاق ماگيسترالدىق مۇناي قۇبىرى جۇيەسى بويىنشا «اداموۆا زاستاۆا» مۇناي تاپسىرۋ پۋنكتى ارقىلى 20 مىڭ توننا مۇنايدى تاسىمالداۋدى جوسپارلاپ وتىر»، - دەدى «قازترانسويل» اق قوعاممەن بايلانىس جانە ىشكى كوممۋنيكاسيالار دەپارتامەنتىنىڭ ديرەكتورى شىڭعىس ءىلياسوۆ.

سونىمەن قاتار اتالعان كومپانيا بيىلعى جىلدىڭ 1 توقسانىندا گەرمانياعا «اداموۆا زاستاۆا» مۇناي تاپسىرۋ پۋنكتى ارقىلى 300 مىڭ توننا مۇناي تاسىمالداۋ ءۇشىن تەحنيكالىق مۇمكىندىكتىڭ بارىن راستايدى. دەگەنمەن ونىڭ ناقتى كولەمى مۇناي كومپانيالارىنىڭ وتىنىمىنە بايلانىستى بولماق.

سونداي-اق، حابارلامادا اقپاندا ەلىمىزدەن گەرمانياعا 20 مىڭ توننا مۇنايدىڭ ءبىرىنشى پارتياسى جەتكىزىلگەنى ايتىلعان.

بۇعان دەيىن ەنەرگەتيكا ءمينيسترى بولات اقشولاقوۆ گەرمانياعا العاشقى مۇناي پارتياسىن اقپاننىڭ سوڭىنا دەيىن جونەلتىلەتىنى تۋرالى ايتقان ەدى.