ارا ۇياسىنا ارنالعان ماۋسىمدىق نورماتيۆ - 5 مىڭ تەڭگە.
ەۋرووداق ساراپشىلارى قازاقستان تاراپىمەن بىرلەسكەن جۇمىس جۇرگىزۋدە، دەپ حابارلايدى Almaty-akshamy.kz اشم باسپا ءسوز قىزمەتىنە سىلتەمە جاساپ.
ەو ساراپشىلارى ۆەتەريناريالىق باقىلاۋ جانە قاداعالاۋ كوميتەتىنىڭ قىزمەتكەرلەرىمەن جانە قازاقستان رەسپۋبليكاسى اۋىل شارۋاشىلىعى مينيسترلىگىنىڭ ۆەدومستۆولىق باعىنىستاعى ۇيىمدارىمەن بىرلەسە وتىرىپ، بال ەكسپورتىنا ەو تالاپتارىن ناقتىلاۋ جانە ەنگىزۋ بويىنشا جۇمىس جۇرگىزۋدە.
تاراپتار بال قالدىقتارىن باقىلاۋدىڭ ۇلتتىق جوسپارىن دايىنداۋ ءۇشىن ميسسيا جوسپارى مەن قۇجاتتامانى تالقىلادى. ءىس-شارا اياسىندا قاتىسۋشىلار زەرتحانالارعا بارىپ، workshop وتكىزدى. سونىمەن قاتار، جوسپاردىڭ ىسكە اسىرىلۋىن تالقىلاۋ ءۇشىن بال وندىرۋشىلەر شاقىرىلدى.
2023 جىلدىڭ سەگىز ايىندا قازاقستان 22 توننا بال ەكسپورتتادى. ونىڭ ىشىندە ساۋد ارابياسىنا - 11،9 توننا، قىرعىزستانعا - 5 توننا، يوردانياعا - 1،3 توننا. سونداي-اق، وتاندىق بال قىتايعا، تۇركياعا، رەسەيگە، موڭعوليا جانە گونكونگقا جىبەرىلدى. 2022 جىلى ءوندىرىس 3 910،7 توننانى قۇرادى. بال ءوندىرىسىنىڭ نەگىزگى ۇلەسى شقو (1833،1 توننا)، الماتى (254،5 توننا)، پاۆلودار (416،7 توننا)، تۇركىستان (219،9 توننا)، اباي (371،2 توننا) جانە جەتىسۋ (293،6 توننا) سياقتى وڭىرلەرگە تيەسىلى.
ءونىمنىڭ قاۋىپسىزدىگىنە كەلەتىن بولساق، "ۆەتەريناريا جونىندەگى ۇلتتىق رەفەرەنتتىك ورتالىق" بالعا مونيتورينگتىك زەرتتەۋلەر جۇرگىزەدى. ەكسپورت جانە يمپورت كەزىندە وڭىرلىك فيليالدار "رەسپۋبليكالىق ۆەتەريناريالىق زەرتحانا" زەرتحانالىق زەرتتەۋلەر جۇرگىزەدى. ولار لاستاۋشى زاتتاردىڭ (انتيبيوتيكتەردىڭ، پەستيسيدتەردىڭ) قالدىق مولشەرىن جانە ۋىتتى ەلەمەنتتەردىڭ (اۋىر مەتالل تۇزدارىنىڭ) شەكتى رۇقسات ەتىلگەن شوعىرلانۋ مولشەرىن انىقتايتىن بولادى.
سونىمەن قاتار، قازاقستاندا ومارتاشىلار ءۇشىن بال ارا ۇيالارىمەن اسىل تۇقىمدىق جانە سەلەكسيالىق جۇمىستاردى جۇرگىزۋگە سۋبسيديا رەتىندە مەملەكەتتىك قولداۋ بار. ارا ۇياسىنا ارنالعان ماۋسىمدىق نورماتيۆ - 5 مىڭ تەڭگە. 2023 جىلى جەرگىلىكتى اتقارۋشى ورگاندار سۋبسيديالاۋعا 422،5 ملن تەڭگە ءبولدى، ال ءبىر جىل بۇرىن بۇل سوما 370،3 ملن تەڭگەنى قۇرادى.