2023 جىلعى 14 قاراشادا قازاقستان رەسپۋبليكاسىنىڭ حالىق سانى 20 ميلليون ادامعا جەتتى.
ۇلتتىق ستاتيستيكا بيۋروسىنىڭ مالىمەتىنە ساي، حالىقتىڭ دەرەكتەر بازاسىنىڭ كورسەتكىشتەرىنە سايكەس، 2023 جىلعى 14 قاراشادا تاڭعى ساعات 8.10-دا تۋعان 5 بالا ەلىمىزدىڭ 20 ميلليونىنشى تۇرعىنى اتاندى.
قازاقستاننىڭ مەرەيلى ازاماتتارى ۇلىتاۋ، جەتىسۋ، اتىراۋ، اقمولا جانە تۇركىستان وبلىستارىندا دۇنيەگە كەلدى. ولاردىڭ ىشىندە 3 ۇل جانە 2 قىز بار، دەپ حابارلايدى Almaty-akshamy.kz.
«20 ميلليونىنشى ازاماتتىڭ تۋعان كۇنى بارلىق قولدا بار دەموگرافيالىق دەرەكتەردى ەسكەرە وتىرىپ ايقىندالدى: قازاقستان رەسپۋبليكاسىنا تۇراقتى تۇرۋعا كەلگەن جانە ودان شىققان، تۋعاندار مەن قايتىس بولعانداردىڭ سانى. بۇرىن حالىق سانى تۋرالى مالىمەتتەر قولمەن وڭدەلەتىن جانە بۇل كوپ ۋاقىتتى قاجەت ەتەتىن. مەملەكەتتىك اقپاراتتىق جۇيەلەردىڭ ينتەگراسياسى بۇل پروسەستى جەدەلدەتۋگە جانە 20 ميلليونىنشى ازاماتتىڭ تۋعان كۇنىن جوعارى دالدىكپەن جانە قىسقا مەرزىمدە انىقتاۋعا مۇمكىندىك بەردى»، - دەلىنگەن ۇلتتىق ستاتيستيكا بيۋروسىنىڭ حابارلاماسىندا.
ەستەرىڭىزگە سالا كەتەيىك، 1991 جىلى قازاقستان رەسپۋبليكاسىنىڭ حالىق سانى 16،4 ملن ادامدى قۇرادى. تاۋەلسىزدىك جىلدارىندا ەل حالقى 22،3% ءوستى. ماسەلەن، 2022 جىلى 1991 جىلمەن سالىستىرعاندا تۋۋ سانى 353،2 مىڭنان 403،9 مىڭ ادامعا دەيىن نەمەسە 14،7% ءوستى.
بالا تۋۋدىڭ ەڭ جوعارى ءمانى 2021 جىلى تىركەلىپ، 446 مىڭ بالانى كورسەتكەن. تابيعي ءوسىمنىڭ ارتۋى، ونىڭ ىشىندە نارەستە ءولىمىنىڭ ازايۋى ناتيجەسىندە قامتاماسىز ەتىلدى. جالپى ءولىم-جىتىم 1991 جىلعى 8،20-دان 2022 جىلى 1000 تۇرعىنعا شاققاندا 6،8 ادامعا دەيىن تومەندەدى. سابيلەر ءولىمىنىڭ كوەففيسيەنتى 3،5-تەن استام ەسە تومەندەگەن.
حالىقتىڭ 1000 ادامعا شاققانداعى تۋۋ كورسەتكىشىن كورسەتەتىن جالپى تۋۋ كوەففيسيەنتى تاۋەلسىزدىك جىلدارى 1991 جىلعى 21،6-دان 2021 جىلى 23،6-عا دەيىن ءوستى. 2022 جىلى بۇل كورسەتكىش 20،7 بولدى.
ەڭ ماڭىزدى دەموگرافيالىق كورسەتكىشتەردىڭ ءبىرى بولىپ تابىلاتىن تۋۋدىڭ جيىنتىق كوەففيسيەنتى 1991 جىلعى 2،7-دەن 1999 جىلى 1،8-گە دەيىن تومەندەدى. كەيىننەن ونىڭ بىرتىندەپ ءوسۋى بايقالدى. 2022 جىلى تۋۋدىڭ جالپى كوەففيسيەنتى 1 ايەلگە 3،05 بالانى قۇرادى.
ورتاشا ءومىر ءسۇرۋ ۇزاقتىعى 1991 جىلمەن سالىستىرعاندا 2022 جىلى 6،8 جىلعا ءوستى، بۇل رەتتە ەرلەر اراسىندا 7،7 جىلعا، ايەلدەردە – 6 جىلعا ءوستى. وسىلايشا، 2022 جىلى قازاقستاندا ءومىر ءسۇرۋ ۇزاقتىعى 74،4 جىلدى قۇرادى. بۇل كورسەتكىش پاندەمياعا دەيىنگى دەڭگەيدەن 1،3 جىلعا اسادى.
بۇعان دەيىن مەملەكەت باسشىسى قاسىم-جومارت توقايەۆتىڭ حالىق سانىنىڭ 20 ميلليون بولۋىمەن قۇتتىقتاعانىن حابارلاعان بولاتىنبىز.