قازاقستان ەۋرازيالىق كەڭىستىكتەگى ەڭ ءىرى سيفرلىق حابتاردىڭ بىرىنە اينالۋعا ءتيىس

استانادا Digital Bridge 2022 حالىقارالىق تەحنولوگيالىق فورۋمىنىڭ پلەنارلىق وتىرىسىندا مەملەكەت باسشىسى وسىلاي دەدى.

ەلىمىزدە ءتورتىنشى رەت ءوتىپ جاتقان فورۋمنىڭ تاقىرىبى – «ورتالىق ەۋرازيا جاڭا تەحنولوگيالىق پلاتفورما رەتىندە قالىپتاسۋدا»، دەپ حابارلايدى Almaty-akshamy.kz

جيىنعا مەملەكەت باسشىسى قاسىم-جومارت توقايەۆ ءتوراعالىق ەتتى.

«ساراپشىلاردىڭ بولجامى بويىنشا، ون جىلدان كەيىن الەمدەگى ونىمدەر مەن قىزمەتتەردىڭ 70 پايىزى سيفرلىق پلاتفورمالىق مودەلدەرگە نەگىزدەلەدى. وسىنداي جاعدايدا قازاقستان ءوز الدىنا ەۋرازيالىق كەڭىستىكتەگى ەڭ ءىرى سيفرلىق حابتاردىڭ بىرىنە اينالۋ ستراتەگيالىق مىندەتىن قويدى. بۇل ءۇشىن بەرىك نەگىز بار. بۇگىندە قازاقستان كوپتەگەن دامىعان ەلدەن وزىپ، بۇۇ-نىڭ سيفرلانعان مەملەكەتتەر رەيتينگىندە ۇزدىك وتىز ەلدىڭ قاتارىنا كىرەدى. قازاقستان سيفرلاندىرۋدىڭ دامىتۋ ۆەكتورىن مازمۇندىق جاعىنان دا، ينستيتۋسيونالدىق تۇرعىسىنان دا ناقتى ايقىنداعانىن اتاپ وتكەن ءجون»، - دەدى مەملەكەت باسشىسى جيىن بارىسىندا سويلەگەن سوزىندە.

ايتا كەتۋ كەرەك، ەلىمىزدىڭ IT سالاسىنداعى ەڭ ءىرى ءىس-شارا وسىمەن ءتورتىنشى رەت ءوتىپ جاتىر.

فورۋمعا حالىقارالىق IT-قوعامداستىقتىڭ كوشباسشىلارى، تەحنولوگيالار سالاسىنداعى وتاندىق جانە شەتەلدىك ساراپشىلار، سيفرلىق ازىرلەمەلەر سالاسىنداعى كاسىپقويلار، IT-كومپانيالار مەن ستارتاپتار، ۆەنچۋرلىق ينۆەستورلار، مەملەكەتتىك ورگاندار قاتىسادى.