قازاقستان ۋكراينا جاعدايىندا بۇۇ-دا قابىلدانعان حالىقارالىق قاعيداتتاردى، اتاپ ايتقاندا اۋماقتىق تۇتاستىق پەن ەگەمەندىكتى مويىنداۋدى نەگىزگە الادى
ەلىمىزدىڭ ۋكرايناداعى توتەنشە جانە وكىلەتتى ەلشىسى دارحان قالەتايەۆ «ۆەستي ۋكراينا» پورتالىنا سۇحبات بەرىپ، قازاقستاننىڭ كوزقاراسى تۋرالى ايتتى، دەپ حابارلايدى Almaty-akshamy.kz Baq.kz سايتىنا سىلتەمە جاساپ.
ۋكراين باسىلىمى كييەۆ پەن ماسكەۋ اراسىنداعى قارۋلى قاقتىعىسقا قاتىستى ەلشىگە ءۇش سۇراق قويعان.
قالەتايەۆ سۇحباتتا قازاقستاننىڭ ۋكراينا توڭىرەگىندەگى جاعدايعا ۇلكەن الاڭداۋشىلىقپەن قارايتىنىن ايتقان.
«قاقتىعىسقا قاتىسپاساق تا، بولىپ جاتقان جاعداي — ءبىزدىڭ حالقىمىز ءۇشىن اۋىر قاسىرەت. ءدال ءقازىر ۋكراينا اۋماعىندا بولىپ جاتقان اسكەري قاقتىعىس قاتتى الاڭداتادى. بۇل — ءبىر نەمەسە ەكى حالىقتىڭ ەمەس، كوپتەگەن حالىقتىڭ تاعدىرىنا اسەر ەتەتىن تراگەديا»، — دەدى دارحان قالەتايەۆ
ۋكراين ءجۋرناليسى "قازاقستان ەكى ەل اراسىنداعى قاقتىعىستا قاي تاراپتىڭ جاعىنا شىعادى؟" دەپ سۇراعان.
«قازاقستان ۋكراينا جاعدايىندا بۇۇ-دا قابىلدانعان حالىقارالىق قاعيداتتاردى، اتاپ ايتقاندا اۋماقتىق تۇتاستىق پەن ەگەمەندىكتى مويىنداۋدى نەگىزگە الادى. قازاقستاننىڭ قازىرگى اسكەري-ساياسي جانجالعا تارتىلۋ ىقتيمالدىعىنا قاتىستى ايتىلىپ جاتقان ماسەلەلەرگە نەمەسە قاۋىپتەرگە كەلسەك، بىرىنشىدەن، قاعيداعا ساي ۇستانىمىمىز بويىنشا ەشكىمگە قارۋ-جاراق جەتكىزبەيمىز. ەكىنشىدەن، ءبىزدىڭ اسكەر قورعانىس قاعيداتتارىن ۇستانادى جانە اسكەري قاقتىعىسقا قاتىسپايدى. سونىمەن بىرگە، قازاقستان ءوزىنىڭ ەگەمەندىك قۇقىعىن نەگىزگە الا وتىرىپ، ۇقشۇ-نىڭ (ۇجىمدىق قاۋىپسىزدىك شارتى ۇيىمى — رەد) اسكەري-ساياسي وداعىنا قاتىسادى. ۇقشۇ مانداتى ناقتى بەلگىلەنگەن. قازاقستان ۇقشۇ مانداتىنان تىس قانداي دا ءبىر مىندەتتەمەلەرمەن بايلانىستى ەمەس. ۇقشۇ-عا قاتىسۋعا وداق ەلدەرىنەن تىس اسكەري وپەراسيالار كىرمەيدى»، — دەپ جاۋاپ بەرگەن ەلشى.
ءوز سوزىندە دارحان قالەتايەۆ قازاقستاننىڭ ۋكرايناداعى ەلشىلىگىنىڭ جۇمىسىنا دا توقتالعان.
«قازاقستاننىڭ ۋكرايناداعى ەلشىلىگى ءالى كۇنگە دەيىن ءوز ازاماتتارىن ەۆاكۋاسيالاۋدى ۇيىمداستىرۋ بويىنشا ءوز ميسسياسىن ورىنداپ جاتىر. ءبىز باسقا ەلدەردىڭ ازاماتتارىنا، سونىڭ ىشىندە وسى قيىن كەزەڭدە بىزگە جۇگىنگەن ۋكراينالىقتارعا كومەك كورسەتۋدەن باس تارتپايمىز»، — دەدى دارحان قالەتايەۆ.