براكونەرلەر اتقان ولجاسىن ات قۇيرىعىنا بايلاپ سۇيرەتىپ اكەلگەن
الماتى وبلىسىندا "ىلە-الاتاۋى" ۇلتتىق پاركى ينسپەكتورلارى ءسىبىر ەلىگىن اتقان براكونەرلەردى ۇستادى، دەپ حابارلايدى Almaty-akshamy.kz ق ر ەگترم ورمان شارۋاشىلىعى جانە جانۋارلار دۇنيەسى كوميتەتىنىڭ باسپا ءسوز قىزمەتى.
تۇرگەن فيليالىنىڭ ينسپەكتورلارى ق.ءاشىموۆ، م. بايتاسوۆ، ك. جىلقايداروۆتار رەيد جۇرگىزگەن. بارلاۋ كەزىندە الماتى مەملەكەتتىك تابيعي كەشەندى قورىعىنىڭ اۋماعىندا اتتىلى الماتى وبلىسىنىڭ ەكى تۇرعىنىنان ەكى مىلتىق پەن ءسىبىر ەلىگى (ەركەگى ەكەن) انىقتالعان.
ءبىر قىزىعى براكونەرلەر اتقان ولجاسىن سول قالپى ات قۇيرىعىنا بايلاپ قويعان. ۇستاۋ كەزىندە قۇيرىعىنا ەلىك بايلانعان جانۋار ۇركىپ، ەلدى مەكەنگە قاشقان. الدىمەن براكونەرلەردى قۇرىقتاعان ينسپەكتورلار ارتىنشا ەلىك بايلانعان اتتى دا ۇستادى.
ينسپەكتورلار قۇقىق بۇزۋشىلاردى الماتى وبلىسى ەڭبەكشىقازاق اۋداندىق پوليسيا باسقارماسىنا جەتكىزدى. ءقازىر اتالعان فاكت بويىنشا سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر.