قازاقستان دەنساۋلىق ساقتاۋ مينيسترلىگى جۇڭگو عالىمدارى جارقاناتتاردان جاڭا كوروناۆيرۋس تاپقانى تۋرالى شەتەلدىك باق-تا جاريالانىپ جاتقان اقپاراتقا قاتىستى مالىمدەمە جاسادى، دەپ حابارلايدى aqshamnews.kz.
"كەيبىر شەتەلدىك بۇقارالىق اقپارات قۇرالدارىندا قىتايلىق عالىمداردىڭ جارقاناتتاردا (HKU5) جاڭا كوروناۆيرۋس تاپقانى تۋرالى اقپارات پايدا بولدى، بۇل جانۋاردان ادامعا جۇعۋ ءقاۋپىن تۋدىرادى. الايدا دۇنيەجۇزىلىك دەنساۋلىق ساقتاۋ ۇيىمىنىڭ، اقش اۋرۋلاردى باقىلاۋ جانە الدىن الۋ ورتالىعىنىڭ جانە قىتايدىڭ اۋرۋلاردى باقىلاۋ جانە پروفيلاكتيكا ورتالىعىنىڭ رەسمي سايتتارىندا بۇل ۆيرۋس تۋرالى رەسمي اقپارات جوق"، - دەلىنگەن مينيسترلىك حابارلاماسىندا.
مينيسترلىك اۋرۋدىڭ الدىن الۋ ءۇشىن كەلەسى پروفيلاكتيكا شارالارىن ساقتاۋدى ۇسىندى: ادامدار كوپ جينالاتىن ورىندارعا، اسىرەسە جابىق ءۇي-جايلارعا بارۋدى شەكتەۋ؛ ءۇي-جايلاردى ۇنەمى جەلدەتۋ؛ قولدى تازالاۋ ءۇشىن انتيسەپتيكتەردى نەمەسە دەزينفەكسيالىق مايلىقتاردى پايدالانۋ؛ ناۋقاس ادامدارمەن بايلانىستى شەكتەۋ، ولاردىڭ وقشاۋلانۋىن قامتاماسىز ەتۋ.
كوروناۆيرۋستىق ينفەكسيا بويىنشا ەلدەگى جاعداي دا تۇراقتى بولىپ قالا بەرەدى. جىل باسىنان بەرى ەلدە كۆي-دىڭ 116 جاعدايى تىركەلدى، وتكەن جىلدىڭ سايكەس كەزەڭىمەن سالىستىرعاندا سىرقاتتانۋشىلىق 8 ەسە تومەندەدى. ءولىم جاعدايلارى جوق. سوڭعى مونيتورينگ دەرەكتەرى بويىنشا وميكرون كىشى نۇسقاسىنىڭ اينالىمى انىقتالعان.
مينيسترلىك اقپاراتىنا سايكەس، ەپيدەميولوگيالىق ماۋسىم باستالعالى بەرى رەسپۋبليكادا ءجرۆي-دىڭ 3،1 ملن جاعدايى تىركەلدى، بۇل وتكەن ماۋسىمنىڭ ۇقساس كەزەڭىنە قاراعاندا 20%-عا از. وسى ەپيدەميولوگيالىق ماۋسىمدا زەرتحانالىق راستالعان تۇماۋدىڭ 2370 جاعدايى تىركەلدى، بۇل وتكەن ەپيدەميولوگيالىق ماۋسىمنىڭ دەڭگەيىنە سايكەس كەلەدى. بۇگىندە 2،3 ملن استام ادام تۇماۋعا قارسى ەكپەمەن ەگىلدى.