2025 جىلعا قاراي 5 مۇناي-گاز حيميا زاۋىتى پايدالانۋعا بەرىلەدى. بۇل تۋرالى ورتالىق كوممۋنيكاسيالار قىزمەتىندەگى باسپاس ءماسليحاتىندا ق ر ۇلتتىق ەكونوميكا ءمينيسترى اسەت ەرعالييەۆ ايتتى، دەپ حابارلايدى almaty-akshamy.kz قازاقپاراتقا سىلتەمە جاساپ.
ونىڭ اتاپ وتۋىنشە، «قازاقستاندىقتاردىڭ ءال-اۋقاتىن ارتتىرۋعا باعىتتالعان ورنىقتى ەكونوميكالىق ءوسۋ» ۇلتتىق جوباسىنىڭ «مۇناي-گاز حيميالىق كەشەنىن دامىتۋ» باعىتى اياسىندا شيكىزاتتىق ەمەس ەكسپورتتى ۇلعايتۋ جانە ىشكى سۇرانىستى قاناعاتتاندىرۋ ءۇشىن ءىرى جوعارى تەحنولوگيالىق مۇناي-گاز حيميالىق ءوندىرىسى ىسكە قوسىلادى.
«2025 جىلعا قاراي 5 مۇناي-گاز حيميا زاۋىتى پايدالانۋعا بەرىلەدى. ناتيجەسىندە مۇناي-گاز حيميالىق ءونىمىن ءوندىرۋ كولەمى 140 مىڭنان 2 ملن تونناعا دەيىن ارتىپ، مۇناي-گاز حيميا ءونىمى يمپورتىنىڭ ۇلەسى 87 پايىزدان 72 پايىزعا ازايادى. بۇل رەتتە دايىن مۇناي-گاز ونىمدەرىنىڭ ەكسپورتى 9 ەسەگە، 1،4 ملرد اقش دوللارىنا ارتادى»، - دەدى مينيستر.