قازاقستان بۇۇ ەكونوميكالىق كەڭەسىنىڭ قۇرامىنا سايلاندى

قازاقستاننىڭ كانديداتۋراسىنا 180 مەملەكەت قولداۋ بىلدىرگەن.

7 ماۋسىم كۇنى وتكەن بۇۇ باس اسسامبلەياسىنىڭ 73ء-شى پلەنارلىق وتىرىسىندا قازاقستان بۇۇ ەكونوميكالىق جانە الەۋمەتتىك كەڭەسىنىڭ (ەكوسوك) قۇرامىنا 2022-2024 جىلدارعا سايلاندى، دەپ حابارلايدى Almaty-akshamy.kz ق ر سىرتقى ىستەر مينيسترلىگىنە سىلتەمە جاساپ.

كەڭەس بۇۇ-نىڭ ەكونوميكالىق، الەۋمەتتىك جانە ەكولوگيالىق قىزمەتىن ۇيلەستىرۋگە جاۋاپتى نەگىزگى ورگان جانە وسى سالالارداعى وزەكتى پروبلەمالار بويىنشا شەشىمدەردى ىلگەرىلەتۋگە ارنالعان ورتالىق الاڭ بولىپ تابىلادى.

«قازاقستان ەكوسوك-تا جاھاندىق ورنىقتى دامۋ سالاسىنداعى ماقساتتاردى ءتيىمدى ىسكە اسىرۋ جانە ورتالىق ازياداعى نەعۇرلىم ماڭىزدى گۋمانيتارلىق پروبلەمالاردى شەشۋ ءۇشىن حالىقارالىق قارجى جانە ساۋدا ۇيىمدارىمەن ىنتىماقتاستىقتى نىعايتۋعا جاردەمدەسۋگە نيەتتى.

كەڭەسكە مۇشەلىك قازاقستانعا ەكونوميكا، الەۋمەتتىك سالا جانە مەملەكەتتىك باسقارۋ رەفورمالارىن جۇزەگە اسىرۋ ماقساتىندا تابىستى الەمدىك تاجىريبەنى تارتۋعا دا ىقپال ەتەتىن بولادى»، - دەلىنگەن ق ر ءسىم حابارلاماسىندا.

ءمالىم ەتىلگەندەي، داۋىس بەرۋ قورىتىندىسى بويىنشا بۇۇ ەكوسوك مۇشەلىگىنە اقش، اۋعانستان، بەليز، بەلگيا، يتاليا، كانادا، كوت-د'يۆۋار، ماۆريكيي، ومان، پەرۋ، تانزانيا، تۋنيس، ءۇندىستان، حورۆاتيا، چەحيا، چيلي جانە ەسۆاتيني ءوتتى.

«قازاقستاننىڭ كانديداتۋراسىن 180 مەملەكەت قولدادى. بۇعان دەيىن قازاقستان بۇۇ ەكوسوك قۇرامىنا 2007–2009 جانە 2014–2016 جىلدار كەزەڭىنە ەكى رەت سايلاندى»، - دەپ ناقتىلادى سىرتقى ساياسات ۆەدومستۆوسىنان.