بۇۇ كوميسسياسى بىتىمگەرلىك وپەراسيالارعا قاتىسۋعا جوسپارلانعان قازاقستاندىق اسكەري قىزمەتشىلەردىڭ ماتەريالدىق-تەحنيكالىق بازاسىنىڭ جاي-كۇيىن جانە دايارلىق دەڭگەيىنە جان-جاقتى تەكسەرۋ جۇرگىزدى.
ءبىر اپتا ىشىندە بۇۇ بىتىمگەرلىك وپەراسيالار دەپارتامەنتىنىڭ اسكەري كونتينگەنتتەردى قالىپتاستىرۋ قىزمەتىن جوسپارلاۋ وفيسەرى سەدريك پاسكال باستاعان ينسپەكتورلار بىتىمگەرلەردىڭ جابدىقتالۋىن، تەحنيكامەن، قارۋ-جاراقپەن، وق-دارىلەرمەن، زاتتاي، ينجەنەرلىك، مەديسينالىق مۇلىكپەن جانە رحب-قورعانىس قۇرالدارىمەن جابدىقتالۋىن تەكسەردى، دەپ حابارلايدى اlmaty-akshamy.kz.
بىتىمگەرلىك دايىندىق ادىستەمەسى مەن جۇيەسىنە، اعىلشىن ءتىلىن مەڭگەرۋ دەڭگەيىنە ەرەكشە نازار اۋدارىلدى.
– ونلاين-اڭگىمەلەسۋ بارىسىندا بۇۇ-نىڭ ءتۇرلى قۇرىلىمدارىنىڭ ساراپشىلارى اسكەري قىزمەتشىلەردىڭ گەندەرلىك تەڭدىك جانە حالىقارالىق گۋمانيتارلىق قۇقىق ماسەلەلەرى بويىنشا بىلىمدەرىن باعالادى، – دەپ ناقتىلادى ق ر قورعانىس مينيسترلىگى بىتىمگەرلىك وپەراسيالار ورتالىعىنىڭ باستىعى پولكوۆنيك باۋىرجان نىعمەتۋللين.
"بىتىمگەر" وقۋ ورتالىعىنىڭ بازاسىندا بۇۇ ينسپەكتورلارى بىتىمگەرلىك بازاسىن كۇزەتۋدى قامتاماسىز ەتۋ، توسقاۋىل بەكەتتەردى ۇيىمداستىرۋ، پاترۋلدەۋ، جاراقات العان كەزدە العاشقى مەديسينالىق كومەك كورسەتۋ جونىندەگى مىندەتتەردى ورىنداۋ كەزىندە بىتىمگەرلەردىڭ ۇيلەسىمدىلىگىن تەكسەردى. سونداي-اق، جارىلعىش قۇرىلعىنى انىقتاۋ كەزىندە ارەكەت ەتۋ الگوريتمى پىسىقتالدى.
ايتا كەتۋ كەرەك، ءبىزدىڭ كونتينگەنت بروندى دوڭگەلەكتى ماشينالارمەن جانە جول تالعامايتىن كولىكتەرمەن جابدىقتالعان.
– بۇۇ ستاندارتتارىنا سايكەس كونتينگەنتتىڭ قارۋ-جاراعىندا تۇرعان تەحنيكا اق تۇسكە بويالعان، سونىمەن قاتار ول ناقتى مىندەتتەرمەن تولىق جابدىقتالعان. مىسالى، بروندالعان دوڭگەلەكتى ماشينالاردىڭ ءبىرى العاشقى مەديسينالىق كومەك كورسەتۋ جانە جارالىلاردى ەۆاكۋاسيالاۋ ءۇشىن قايتا جابدىقتالعان، – دەپ ءتۇسىندىردى ماتەريالدىق-تەحنيكالىق قامتاماسىز ەتۋ باسقارماسىنىڭ باستىعى – ورتالىق باستىعىنىڭ ورىنباسارى پودپولكوۆنيك رۋستام جانجۇمەنوۆ.
بۇۇ ساراپشىلارى بىتىمگەرلىك كونتينگەنتىنىڭ جەكە قۇرامىن دايارلاۋدىڭ جانە بىتىمگەرلىك وپەراسيالار ورتالىعىنىڭ نۇسقاۋشى قۇرامىنىڭ كاسىبيلىگىنىڭ جوعارى دەڭگەيىن اتاپ ءوتتى. بىتىمگەرلىك كونتينگەنتتىڭ بىتىمگەرلىك ميسسياسىن ءوز بەتىنشە ورىنداۋعا دايىندىعىن باعالاۋ جونىندەگى تۇپكىلىكتى دەرەكتەردى بۇۇ كوميسسياسى 2024 جىلعى قاڭتاردا ۇسىناتىن بولادى.
