بىشكەكتە جەر سىلكىنىسىنە ءتوزىمدى قۇرىلىس بويىنشا حالىقارالىق ساراپشىلار قاۋىمداستىعىنىڭ بازاسىندا سەيسميكالىق قاۋىپسىزدىكتى قامتاماسىز ەتۋدى ارتتىرۋ ماسەلەلەرى تالقىلاندى.
دوڭگەلەك ۇستەلگە حالىقارالىق ساراپشىلار مەن عالىمدار، سونداي-اق قۇرىلىس ديناميكاسى جانە عيماراتتاردى تابيعي، تەحنوگەندىك اسەرلەردەن قورعاۋ سالاسىنداعى عىلىمي باياندامالار بايقاۋىندا ب ا ق سىناعان جاس عالىمدار قاتىستى، دەپ حابارلايدى اlmaty-akshamy.kz.
دوڭگەلەك ۇستەل «ورتالىق ازيا ەلدەرىندەگى عيماراتتار مەن قۇرىلىستاردىڭ جەر سىلكىنىسىنە توزىمدىلىگىن ارتتىرۋ» تاقىرىبىنا ارنالدى. ونىڭ نەگىزگى ماقساتى – اپات تۋىنداعان جاعدايدا قاۋىپسىزدىك ماسەلەلەرى بويىنشا جەتەكشى ساراپشىلار مەن ينستيتۋتتاردىڭ جۇمىسىن ۇندەستىرۋ.
ۇيىمداستىرۋشىلاردىڭ ايتۋىنشا، قازىرگى كەزدە ساراپشىلاردىڭ نازارىن جەر سىلكىنىسىنە ءتوزىمدى قۇرىلىس ماسەلەلەرىنە اۋدارۋ اسا ماڭىزدى. سەبەبى، اپات ايتىپ كەلمەيدى دەمەكشى، جەر سىلكىنىسى دە كەز كەلگەن مەزەتتە ورىن الۋى مۇمكىن. سوندىقتان بۇل ءاردايىم وزەكتى تاقىرىپتاردىڭ ءبىرى. سول سەبەپتى دە دوڭگەلەك ۇستەل اياسىندا قازاقستان رەسپۋبليكاسىنداعى عيماراتتار مەن قۇرىلىستاردىڭ ەكسپەريمەنتتىك سىناقتارى، عيماراتتاردىڭ ديناميكاسى مەن قاۋىپسىزدىگى سالاسىنداعى جاس عالىمداردىڭ عىلىمي-ەكسپەريمەنتتىك ازىرلەمەلەرىن قولداۋ، قازىرگى جاعدايدا حالىقارالىق ستاندارتتار كريتەرييلەرى بويىنشا ماماندار دايارلاۋ ساپاسى بويىنشا باياندامالار تىڭدالدى.
ءىس-شارا سوڭىندا قاتىسۋشىلار وسى سالاداعى وزىق ازىرلەمەلەر اياسىندا پىكىر الماسىپ، سەيسميكالىق قاۋىپتىلىگى جوعارى اۋداندارداعى ادامدار مەن وبەكتىلەردىڭ قاۋىپسىزدىگىن قامتاماسىز ەتۋدىڭ ماڭىزدى ماسەلەلەرى تالقىلادى. عالىمداردىڭ پىكىرىنشە، بۇل پروسەسس ۇزدىكسىز جالعاسۋى ءتيىس.
حالىقارالىق كونكۋرسقا بەلسەندى قاتىسقانى ءۇشىن جاس عالىمداردىڭ 3 ۇزدىك عىلىمي-زەرتتەۋ جانە عىلىمي-پراكتيكالىق جوباسى «Maurer» seismic Protection Systems نەمىس كومپانياسى تاراپىنان جوعارى باعالانىپ، ديپلومدار مەن قارجىلاي سىياقى جەڭىپ الدى. كونكۋرستىڭ اشىق، ءارى ءادىل ءوتۋىن جەتەكشى عالىمدار، ساراپشىلار، اكادەميكتەردەن تۇراتىن ارنايى كوميسسيا قاداعالادى.
