ولارعا اي سايىنعى جالاقىسى ءۇش ەسە تولەنەتىن بولادى.
قورعانىس مينيسترلىگى قازاقستان بىتىمگەرلەرىنىڭ گولان جوتالارىنا اتتانۋعا دايىندالىپ جاتقانىن ايتتى، دەپ حابارلايدى Almaty-akshamy.kz
ءقازىر 19 اسكەري قىزمەتشى ءتورت مەملەكەتتە بۇۇ-نىڭ بىتىمگەرلىك ميسسياسىن اتقارىپ كەلەدى.
بىرىككەن ۇلتتار ۇيىمىنىڭ نيۋ-يوركتەگى شتاب-پاتەرىندە گولان جوتالارىنداعى بولىنگەن جەرلەردى «بۇۇ-نىڭ باقىلاۋ كۇشتەرى» (SONNR) ميسسياسىنا بىتىمگەرلىك كونتينگەنتتى جىبەرۋ ءۇشىن قازاقستان رەسپۋبليكاسىنىڭ ۇكىمەتى مەن بىرىككەن ۇلتتار ۇيىمى اراسىندا ءوزارا تۇسىنىستىك تۋرالى مەموراندۋمعا قول قويىلدى.
قورعانىس مينيسترلىگىنىڭ حابارالۋىنشا، العاش رەت بىرىككەن ۇلتتار ۇيىمى قازاقستانعا بىتىمگەرلىك ميسسيانى ءوز بەتىنشە جىبەرۋگە جانە ورىنداۋعا ماندات بەردى. قازاقستاندىق كونتينگەنتتىڭ قۇرامىندا 139 اسكەري قىزمەتشى بار. قازاقستان بىتىمگەرلەرى بۇۇ ميسسياسىنىڭ مانداتىنا سايكەس، قارسىلاس تاراپتار اراسىندا اتىستى توقتاتۋ رەجيمىن ساقتاۋ مىندەتتەرىن ورىندايتىن بولادى.
ميسسيانى ورىنداۋ ءۇشىن قازاقستاندىق اسكەري قىزمەتشىلەر بۇۇ-نىڭ تالاپتارى مەن ستاندارتتارىنا سايكەس، مۇقيات ىرىكتەۋدەن جانە دايارلىقتان ءوتتى. كەشەندى التى ايلىق دايىندىق قورعانىس مينيسترلىگىنىڭ بىتىمگەرلىك وپەراسيالار ورتالىعىندا ۇيىمداستىرىلدى. اسكەري قىزمەتشىلەردى وقىتۋعا بىتىمگەرلىك وپەراسيالار، مينادان تازارتۋ جانە اسكەري مەديسينا ورتالىقتارىنىڭ نۇسقاۋشىلار قۇرامى قاتىستى. اسكەري قىزمەتشىلەر اعىلشىن ءتىلىن، كۇش قولدانۋ ەرەجەلەرىن، حالىقارالىق جانە گۋمانيتارلىق قۇقىق نورمالارىن وقىدى. بىتىمگەرلىك بازانى قورعاۋ، توسقاۋىل بەكەتتەرىن ۇيىمداستىرۋ، پاترۋلدەۋ، جارىلعىش قۇرىلعىلاردى زالالسىزداندىرۋ، كومەك كورسەتۋ جانە ەۆاكۋاسيالاۋ بويىنشا مىندەتتەر ءىس جۇزىندە پىسىقتالدى، – دەلىنگەن حابارلامادا.
پراكتيكالىق داعدىلاردى جانە كونتينگەنت شتابىنىڭ وفيسەرلەرىمەن جەدەل ۇيلەسىمدىلىكتى ارتتىرۋ ءۇشىن جەدەل-تاكتيكالىق دەڭگەيدە اسكەري شەشىمدەر قابىلداۋ بويىنشا ساباقتار وتكىزىلدى. ساراپشىلاردىڭ باعالاۋى بويىنشا، كونتينگەنت جەكە قۇرامى جوعارى دايىندىق دەڭگەيىن، مىقتى موتيۆاسيا كورسەتكەن.
قورعانىس مينيسترلىگى ميسسيانى بۇۇ-نىڭ ستاندارتتارىنا سايكەس قارۋ-جاراق پەن اسكەري تەحنيكانىڭ زاماناۋي ۇلگىلەرىمەن جان-جاقتى قامتاماسىز ەتۋ جونىندە اۋقىمدى ءىس-شارالار كەشەنىن ىسكە اسىردى.
كونتينگەنتتە جاۋىنگەرلىك مودۋلدەرمەن جابدىقتالعان بروندالعان دوڭگەلەكتى ماشينالار، سونداي-اق كۇندەلىكتى تىرشىلىككە قاجەتتى جابدىقتار بار. ولاردى قامتاماسىز ەتۋگە كامازدار، جول تالعامايتىن اۆتوموبيلدەر جانە ينجەنەرلىك مۇلىك بار. جارالىلاردى ەۆاكۋاسيالاۋعا بەرىلگەن ماشينالاردىڭ ءبىرى وتتەگى اپپاراتىمەن، دەفيبريللياتورمەن، دارى-دارمەكتەرمەن جانە باسقا دا مەديسينالىق جابدىقتارمەن جابدىقتالعان.
«ميسسيادان ءوتۋ كەزىندە بىتىمگەرلىك كونتينگەنتىنىڭ اسكەري قىزمەتشىلەرىنە اي سايىنعى جالاقىسى ءۇش ەسە تولەنەتىن بولادى. بۇدان وزگە، بۇۇ بيۋدجەتىنەن ولار اي سايىن 1448 دوللاردان اسا قاراجات الاتىن بولادى. ميسسيادا قىزمەت اياقتالعاننان كەيىن اسكەري قىزمەتشىلەر شيپاجايلاردا ەمدەلە الادى جانە نەگىزگى دەمالىسقا جىل سايىن قوسىمشا 14 تاۋلىك قوسىلادى. تۇتاستاي العاندا، قازاقستاننىڭ قارۋلى كۇشتەرى بىتىمگەرلىك ميسسيالارعا اسكەري باقىلاۋشىلار مەن شتاب وفيسەرلەرى رەتىندە جەكەلەگەن اسكەري قىزمەتشىلەردى دە، سونداي-اق جاياۋ اسكەر، مەديسينالىق، بارلاۋ، ينجەنەرلىك سياقتى نەعۇرلىم تالاپ ەتىلەتىن مامانداندىرىلعان بولىمشەلەردى دە جىبەرۋگە دايىن»، – دەلىنگەن حابارلامادا.
16 جىل ىشىندە 600-دەن استام قازاقستاندىق اسكەري قىزمەتشى بۇۇ-نىڭ ازيا، تاياۋ شىعىس جانە افريكا ەلدەرىندەگى 7 بىتىمگەرلىك ميسسياسىنا قاتىستى. ءقازىر 19 قازاقستاندىق اسكەري قىزمەتشى بۇۇ-نىڭ ليۆان رەسپۋبليكاسىنداعى، باتىس ساحاراداعى، كونگو دەموكراتيالىق رەسپۋبليكاسىنداعى جانە ورتالىق افريكا رەسپۋبليكاسىنداعى بىتىمگەرلىك ميسسيالارىنىڭ قۇرامىندا قىزمەت ەتىپ كەلەدى.