بۇل تۋرالى توتەنشە جاعدايلار ءمينيسترى شىڭعىس ءارىنوۆ ۇكىمەت ۇيىندە ايتتى،دەپ حابارلايدى Almaty-akshamy.kz
«بۇگىنگى تاڭدا ەلىمىزدە اعىمداعى سۋ تاسقىنى جاعدايى ءبىرشاما تۇراقتالدى. قازگيدرومەتتىڭ اقپان جانە ناۋرىز ايلارىنىڭ سوڭىنا بولجامىنا سايكەس، رەسپۋبليكانىڭ وڭتۇستىك-شىعىس، سولتۇستىك جانە ورتالىق بولىكتەرىندە تاۋلىگىنە ايلىق نورمامەن مول جاۋىن-شاشىن ءتۇسۋى مۇمكىن. وسىعان بايلانىستى 10 ءوڭىردىڭ ەلدىمەكەندەرىن، ونىڭ ىشىندە الماتى، تۇركىستان، شىعىس قازاقستان جانە جەتىسۋ وبلىستارىندا تاۋ سۋلارىنىڭ اعىنى سالدارىنان سۋ باسۋ ءقاۋپى بار»، - دەدى مينيستر ۇكىمەتتىڭ بۇگىنگى وتىرىسىندا.
سونىمەن بىرگە، باتىس قازاقستان، اقمولا، سولتۇستىك قازاقستان، قاراعاندى، پاۆلودار جانە قوستاناي وڭىرلەرىندە قاردىڭ كوپ ەرۋىنە بايلانىستى سۋ تاسقىنى ءقاۋپى بار.
«ءسوزسىز، مينيسترلىك جەرگىلىكتى اتقارۋشى ورگاندارمەن بىرلەسىپ، سۋ تاسقىنى كەزەڭىنە دايىندىق بويىنشا قاجەتتى ءىس-شارالار كەشەنىن وتكىزدى. «كوكتەم» رەسپۋبليكالىق كوماندالىق شتابتىق وقۋ-جاتتىعۋ شەڭبەرىندە باسقارۋ ورگاندارىنىڭ كۇشتەرى مەن قۇرالدارىنىڭ ناقتى دايىندىعى تەكسەرىلدى. حالىقتى قۇلاقتاندىرۋ پىسىقتالدى، زارداپ شەككەن ازاماتتاردى جيناۋ پۋنكتتەرى دايىندالدى»، - دەدى ش.ءارىنوۆ.