ارپا جانە جەمشوپ داقىلدارى – بۇكىل جۇڭگو بويىنشا ەكسپورتتالادى.
ۇكىمەتتە ۆيسە-پرەمەر سەرىك ءجۇمانعاريننىڭ توراعالىعىمەن وتكەن ەگىن جيناۋ ناۋقانى بويىنشا جەدەل شتابتا ەكسپورتقا استىق جەتكىزۋدى ۇلعايتۋ مۇمكىندىكتەرى قارالدى، دەپ حابارلايدى aqshamnews.kz.
اۋىل شارۋاشىلىعى مينيسترلىگىنىڭ مالىمەتىنشە، «قتج» ۇك اق باسقارۋشى ديرەكتورى باۋىرجان ورىنباساروۆ بيىلعى 9 ايدا قازاقستاندىق استىق پەن ۇندى تەمىرجولمەن جەتكىزۋدىڭ نەگىزگى نارىقتارىن تانىستىردى. استىقتى تيەپ جونەلتۋدىڭ جالپى كولەمى 6،6 ملن توننانى قۇراسا (وتكەن جىلدىڭ وسى كەزەڭىمەن سالىستىرعاندا 21%-عا از)، تارتىلعان ونىمدەردى تاسىمالداۋ كولەمى پروپورسيونالدى تۇردە وسكەن – 2،7 ملن توننا (2023 جىلدىڭ 9 ايىمەن سالىستىرعاندا 21%-عا ارتىق). 6،6 ملن توننا استىقتىڭ 5 ملن تونناسى ەكسپورتقا جىبەرىلدى، تەك قىركۇيەكتە عانا 900 مىڭ توننا جونەلتىلدى. تارتىلعان ونىمدەردىڭ ەكسپورتى 2،1 ملن توننانى قۇرادى، ونىڭ ىشىندە – 310 مىڭ توننا قىركۇيەك ايىنا تيەسىلى.
«قازاقستاننىڭ استىعى جەتكىزىلەتىن نەگىزگى ەلدەر – ورتالىق ازيا (2،9 ملن توننا)، جۇڭگو (1،3 ملن توننا)، اۋعانستان (127 مىڭ توننا)، بۇل بيىلعى 9 اي ىشىندەگى كولەم. سالىستىرمالى تۇردەگى تىنىشتىقتان كەيىن يرانعا 211 مىڭ توننا استىق جەتكىزۋ قايتا جانداندى، ونىڭ 140 مىڭ تونناسى قىركۇيەك ايىنا تيەسىلى. باسقا ەلدەرگە – يتالياعا، تۇركياعا جانە رەسەيگە 423 مىڭ توننا جونەلتىلدى. نەگىزگى ەلدەرگە قاڭتار-قىركۇيەك ايلارىندا 495 مىڭ توننا – ورتالىق ازياعا، 639 مىڭ توننا – قىتايعا، 666 مىڭ توننا – اۋعانستانعا جونەلتىلدى»، — دەپ حابارلادى باۋىرجان ورىنباساروۆ.
وتىرىستا قازاقستاندىق استىقتى قىتايعا جەتكىزۋدىڭ وڭىرلىك دەڭگەيى قارالدى. 9 ايدىڭ قورىتىندىسى بويىنشا استىقتى جابىق ۆاگونداردا تاسىمالداۋ كولەمى 75%-عا جانە استىق تاسىعىشتاردا 5%-عا ءوستى. كونتەينەرلەرمەن جەتكىزۋ 26%-عا تومەندەدى. بۇل جابىق ۆاگوندار مەن استىق تاسىعىشتارداعى داقىلداردىڭ نەگiزگi كولەمiنiڭ قورعاس جانە الاشانكوۋ ستانسالارى ارقىلى سۋاردىڭ بوندتىق ايماعىنا جەتكiزiلۋiمەن بايلانىستى، وندا دايىن ءونiمدi قايتا وڭدەۋ جانە ودان ءارi جونەلتۋ ءۇشiن باج سالىعى جوق. وسىلايشا، قازاقستاندىق بيداي نەگىزىنەن قىتايدىڭ شەكارالىق جانە ورتالىق پروۆينسيالارىن قامتاماسىز ەتەدى. قحر ىشىنە جەتكىزۋ ءۇشىن 65% باج سالىعى قولدانىلادى جانە ول باعىتتار بويىنشا استىق نەگىزىنەن كونتەينەرلەرمەن تاسىمالدانادى. بۇل رەتتە ارپا جانە باسقا دا جەمشوپ داقىلدارى ءىرى دايىنداۋشى كومپانيالاردىڭ قاجەتتىلىكتەرىنە سايكەس بۇكىل جۇڭگو بويىنشا ەكسپورتتالادى.
«ءبىزدىڭ الدىمىزدا بيىل قىتايعا 2 ملن توننا استىق جەتكىزۋ مىندەتى تۇر، ءبىز ونىڭ كولەمىن 3 ملن تونناعا دەيىن ارتتىرا الامىز. سونداي-اق اۋعانستانعا ۇن جەتكىزۋدى ۇلعايتۋ قاجەت. جاڭا كەلىسىمشارتتار مەن لوگيستيكا الماتىدا وتەتىن قازاقستان-اۋعانستان بيزنەس-فورۋمىنىڭ باستى ماسەلەلەرىنىڭ ءبىرى بولۋى ءتيىس»، — دەدى جەدەل شتاب وتىرىسىنىڭ قورىتىندىسىندا سەرىك جۇمانعارين.
7 قازانداعى جاعداي بويىنشا قازاقستاندا ءداندى داقىلداردىڭ بارلىق القابىنىڭ 94%-ى، كارتوپتىڭ 90،5%-ى، كوكونىستەردىڭ 84،6%-ى، مايلى داقىلداردىڭ 30%-ى، قانت قىزىلشاسىنىڭ 23%-ى جينالدى. ەگىن جيناۋ ناۋقانى باستالعالى ەليەۆاتورلارعا 4،4 ملن توننا استىق ءتۇستى.