ءتيىستى كودەكس قابىلداندى.
ءقازىر ەلىمىزدە لۋدومان رەتىندە رەسمي تىركەلگەن 13- اق ادام بار. شىن مانىندە، بۇل دەرتپەن ءاربىر بەسىنشى ادام اۋىرادى، دەپ حابارلايدى aqshamnews.kz.
وسىنداي جانداردىڭ ءبىرى 35 جاستاعى قۋانىش ءجۇنىسوۆ قۇمار ويىنعا سالىنىپ، بار مۇلكىنەن ايىرىلعان، وتباسىن ويران ەتكەن.
«ويىن ءومىرىمنىڭ مانىنە اينالدى. بۋكمەكەرلىك كەڭسەگە العاش رەت 25 جاسىمدا باردىم. سودان توقتاماي 9 جىل وينادىم. ايەل، بالا-شاعام تەرىس اينالىپ، ۇيدەن كەتىپ قالدى. جامان جولدا جۇرگەنىمدى ءبارىن جوعالتقاندا عانا ءتۇسىندىم»،- دەيدى ول.
ءقازىر قۋانىش جەكە كلينيكادا ەمدەلىپ جاتىر. 9 جىلدا قۇتىلا الماعان دەرتىمنەن 9 ايدا ايىعىپ كەلەمىن دەيدى.
ال ءوزىن رۋسلان دەپ تانىستىرعان جىگىتتەردىڭ ءبىرى نەبارى 25-تە. ءجاسوسپىرىم كەزىنەن ءباس تىككەن.
«ءقازىر قارىزدارىمدى جايلاپ جاۋىپ جاتىرمىن. ەمدەلىپ، 5 اي بويى تولىق كۋرستان ءوتتىم. ءبارى رەتىمەن دۇرىستالىپ كەلەدى»، - دەدى رۋسلان.
ءبىراق قۋانىش پەن رۋسلان سەكىلدى قاتەسىن تۇسىنگەندەردىڭ ءبارى بىردەي اقىلى كومەككە جۇگىنە المايدى. ويتكەنى، جەكە رەابيليتاسيالىق ورتالىقتاردان ەم الۋعا كەمىندە 2 ميلليون تەڭگە كەرەك.
پسيحولوگ سەرىكگۇل ءساليدىڭ ايتۋىنشا، ەمدەۋ كۋرسى جالپى 8 ايدان تۇرادى. لۋدومانيا اۋرۋى بۇل جالماۋىز اۋرۋ، ءبارىن جالمايدى. لۋدومان مەن ەندى اۋىرمايمىن دەگەنىمەن، اۋرۋ ونى جەڭەدى. ءبىزدىڭ الدىمىزدان ايىنا 100 لۋدومان وتسە، سونىڭ 98، 99-ى وزىنە قول سالۋ تۋرالى ويلاعان.
تاجىريبەلى ادديكتولوگ داۋرەن اسسالاۋ قۇمارلىقتان قۇتىلعىسى كەلسە دە، شىرماۋىنان شىعا المايتىنداردىڭ قانداي كۇيدە بولاتىنىن جاقسى بىلەدى. لۋدومانيادان ۇزاق جىل ەمدەلگەن ول ءقازىر وسى دەرتكە شالدىققاندارعا تەگىن كومەك بەرىپ ءجۇر.
«15 جىل بويى قۇمار ويىن وينادىم. بۇدان مامانداردىڭ كومەگىمەن قۇتىلدىم. كەيىن ءوزىم دە پسيحولوگقا وقىپ، تاۋەلدىلىكتەن ارىلا الماي جۇرگەندەرگە قيىندىقتان شىعۋ جولىن كورسەتە باستادىم»، - دەيدى داۋرەن اسسالاۋ.
جالپى لۋدومانيانى مەملەكەتتىك كلينيكالار دا تەگىن ەمدەيدى. ءقازىر ولار ەلىمىزدىڭ بارلىق وڭىرلەرىندە بار. ءبىراق بۇلارعا جىلىنا جالپى سانى 20 ادام عانا كەلەدى. ال بۋكمەكەرلىك كەڭسەلەردىڭ جۇمىسى قىزىپ تۇر. بىلتىر جىلدىق اينالىمى 1 تريلليون تەڭگەگە جەتكەن. بيىلدىڭ وزىندە 2 ميلليون ادام ونلاين ويىنشى رەتىندە تىركەلگەن. سونىڭ 400 مىڭى وسى كەڭسەلەردىڭ تۇراقتى كليەنتىنە اينالعان.
لۋدومانيانى دۇنيەجۇزىلىك دەنساۋلىق ساقتاۋ ۇيىمىنىڭ پسيحيكالىق سىرقاتتار ساناتىنا قوسقالى قاشان. ويىنقۇمارلىق قازاقستاندا دا بىلتىر رەسمي تۇردە اۋرۋ قاتارىنا قوسىلدى. ءبىراق ءدال ءقازىر ەلىمىزدە لۋدومان رەتىندە تىركەلگەن 13-اق ادام بار.
دەمەك، بۇدان بىلاي مەملەكەتتىك كلينيكالاردا مۇنداي ازاماتتاردىڭ ءاتى-جونى قۇپيا ساقتالادى. جاقىندا ءتيىستى كودەكس قابىلداندى. ەندى ونى اۋرۋحانالاردا ىسكە اسىرۋ تەتىكتەرى تالقىلانىپ جاتىر. Cونداي-اق، ۇكىمەت قۇمار ويىنمەن كۇرەستىڭ ەكى جىلدىق جوسپارىن بەكىتتى ول ءۇشىن جىل سايىن كەمىندە 14 مىڭ ونلاين كازينو مەن بۋكمەكەرلىك سايتتاردى بۇعاتتايدى. ال لوتەرەيا ويىندارىن جارنامالاعاندار ەڭ از دەگەندە 200 مىڭ ايىپپۇل تولەيدى.