قازاقستان ارمياسى تۇرىك وندىرىسىندەگى Bayraktar ۇشقىشسىز ۇشۋ اپپاراتتارىن (ۇۇا) الۋدى جوسپارلاپ قانا قويماي، ولاردى ەل اۋماعىندا ءوندىرۋدى دە قولعا الماق، دەپ حابارلايدى aqshamnews.kz ق ر قورعانىس مينيسترلىگىنە سىلتەمە.
قورعانىس ءمينيسترى رۋسلان جاقسىلىقوۆ پەن Baykar Defence كومپانياسىنىڭ باس ديرەكتورى حالۋك بايراكتاردىڭ اراسىنداعى كەلىسسوزدەر ستامبۋلدا وتكەن Saha Expo – 2024 كورمەسى اياسىندا ءوتتى.
«تاراپتار قازاقستان اۋماعىندا تاكتيكالىق ۇشقىشسىز ۇشۋ جۇيەلەرى مەن بارراجدىق وق-دارىلەردى جەرگىلىكتى دەڭگەيدە ءوندىرۋ بويىنشا جول كارتاسىن ازىرلەۋ تۋرالى كەلىسىمگە كەلدى»، — دەپ حابارلادى مينيسترلىك.
كورمەدە قازاقستاندىق دەلەگاسياعا Bayraktar AKICI، Bayraktar TB3، Bayraktar TB2، Bayraktar Kalkan ۇشقىشسىز ۇشۋ اپپاراتتارى مەن Mosquito-X بارراجدىق وق-دارىلەرى تانىستىرىلدى.
كەلىسسوزدەردىڭ قورىتىندىسى بويىنشا ق ر قورعانىس مينيسترلىگى مەن Baykar كومپانياسى اراسىنداعى جۇمىس كەزدەسۋىنىڭ حاتتاماسىنا قول قويىلدى. تۇرىك تاراپى Bayraktar Kalkan، Bayraktar Mini ۇشقىشسىز اپپاراتتارى مەن Mosquito-X بارراجدىق وق-دارىلەرىن قازاقستاندىق اسكەري سىناقتار ءۇشىن تەگىن بەرۋگە نيەتتى ەكەنىن راستادى.
سونىمەن قاتار، قورعانىس مينيسترلىگى ءوز تاراپىنان دا ۇشقىشسىز جۇيەلەر بويىنشا ازىرلەمەلەردىڭ جۇرگىزىلىپ جاتقانىن اتاپ ءوتتى. الماتىداعى ماماندار قازىرگى ۋاقىتتا اسكەردە سىنالىپ جاتقان درونعا قارسى قارۋلاردى جاساپ شىعارعان.