قازاقستان ءازىربايجانعا شىعارماشىلىق ورتالىق سالىپ بەرەدى

بيىل قىركۇيەك ايىندا ىرگەتاسى قالانىپ، 2023 جىلدىڭ جەلتوقسانىندا پايدالانۋعا بەرىلەدى.

قازاقستان پرەزيدەنتىنىڭ شەشىمىمەن فيزۋلي قالاسىندا قۇرمانعازى اتىنداعى شىعارماشىلىقتى دامىتۋ ورتالىعىنىڭ ىرگەسى قالانادى، دەپ حابارلايدى Almaty-akshamy.kz اقورداعا سىلتەمە جاساپ.

مەملەكەت باسشىسى قازاق حالقىنىڭ اتىنان جاسالعان بۇل سىيلىق ەلدەرىمىزدىڭ دوستىعىنىڭ، باۋىرلاستىعىنىڭ جانە ءوزارا قولداۋدىڭ تاعى ءبىر نىشانى بولاتىنىن اتاپ ءوتتى.

ونەر ورتالىعىنىڭ جالپى اۋدانى – 3100 شارشى مەتر. ەكى قاباتتى عيمارات 600 ادامعا ارنالعان. بيىل قىركۇيەك ايىندا ىرگەتاسى قالانىپ، 2023 جىلدىڭ جەلتوقسانىندا پايدالانۋعا بەرىلەدى.

«فيزۋلي قالاسىنداعى قۇرمانعازى اتىنداعى شىعارماشىلىق ورتالىعى مۋزىكا جانە مۋزىكالىق اسپاپتار، زاماناۋي تەحنولوگيالار: جۇمىس جابدىقتارى، 3D مودەلدەۋ، ۆەب-ديزاين، فوتو جانە ۆيدەو كۋرستار باعىتىندا جۇمىس ىستەيتىن بولادى»، - دەلىنگەن حابارلامادا.

سونىمەن قاتار كىلەم توقۋعا، قولونەرگە، ءتۇرلى سپورت پەن حورەوگرافياعا باۋليتىن سىنىپتار اشىلادى.

يلحام الييەۆ قاسىم-جومارت توقايەۆقا شەكسىز العىسىن ايتىپ، فيزۋلي قالاسىنىڭ بالالارى ءۇشىن الەمدىك دەڭگەيدەگى شىعارماشىلىق ورتالىق بولادى دەپ سەنەتىنىن جەتكىزدى.