الماتىلىق دارىگەر سكرينينگتىڭ ماڭىزى جايلى اڭگىمەلەپ بەردى.
"قاتەرلى ىسىكتىڭ الدىن الۋ ماقساتىندا جوسپارلى سكرينينگتەردەن ۋاقتىلى ءوتىپ تۇرۋ قاجەت"، - دەيدى الماتى ونكولوگيالىق ورتالىعىنىڭ كلينيكا-دياگنوستيكا ءبولىمى مەڭگەرۋشىسى ءنايليا اقجولوۆا، دەپ حابارلايدى Almaty-akshamy.kz
ونكولوگيالىق سىرقات كوپ جاعدايدا ءبىراز ۋاقىتقا دەيىن ەشقانداي بەلگى بەرمەيدى، ونىڭ قاۋىپتىلىگى دە وسىندا. ادەتتە اۋرۋ سيمپتومدارى ءۇشىنشى نەمەسە ءتورتىنشى ساتىدا عانا بىلىنە باستايدى. سوندىقتان قاتەرلى ىسىكتىڭ الدىن الۋ ماقساتىندا جوسپارلى سكرينينگتەردەن ۋاقتىلى ءوتىپ تۇرۋ قاجەت، دەيدى الماتى ونكولوگيالىق ورتالىعىنىڭ كلينيكا-دياگنوستيكا ءبولىمى مەڭگەرۋشىسى ءنايليا اقجولوۆا.
ايتۋىنشا، قاتەرلى ىسىك ۇزاق ۋاقىت بويى قالىپتاسىپ جەتىلەدى. سول سەبەپتى ەرتە انىقتالعان جاعدايدا اۋرۋدىڭ اسقىنۋىنا جول بەرمەي، ۋاقتىلى ەم-دوم جاساۋعا مۇمكىندىك بار.
«ەڭ الدىمەن، دەر كەزىندە جاسالعان دياگنوستيكا وبىردى باستاپقى ساتىدا انىقتاپ، ناۋقاستى ەمدەپ جازۋعا مۇمكىندىك بەرەتىنىن ايتقىم كەلەدى. باستاپقى ساتىسىندا قاتەرلى ىسىكتەن قۇلان-تازا ايىعىپ كەتۋگە بولادى، – دەيدى مامان. – ال ءۇشىنشى، ءتورتىنشى ساتىدا ەم-دومنىڭ اۋىر تۇرلەرى، حيميوتەراپيا، راديكالدى وپەراسيالار قولدانىلادى. ىسىكپەن كىشىگىرىم كەزىندە، پايدا بولعان كەزدە كۇرەسكەن جەڭىل، ۇلكەيىپ كەتكەندە ول پاسيەنت ومىرىنە ءقاۋىپ توندىرەدى».
تيىمدىلىگى دالەلدەنگەن سكرينينگ تۇرلەرى:
- 40 پەن 70 جاس ارالىعىنداعى ايەلدەردى ءسۇت بەزى وبىرىنا ماموگرافيالىق سكرينينگتەن وتكىزۋ – 2 جىلدا 1 رەت؛
- 30 بەن 70 جاس ارالىعىنداعى ايەلدەردى جاتىر موينى وبىرىنا سيتولوگيالىق سكرينينگتەن وتكىزۋ – 4 جىلدا 1 رەت؛
- 50 مەن 70 جاس ارالاعىندا قان ارقىلى، كولونوسكوپيا ادىسىمەن توق ىشەك/تىك ىشەك وبىرىنا تەكسەرۋ – 2 جىلدا 1 رەت؛
وسى جىلدىڭ 6 ايىندا الماتى قالاسى بويىنشا 2363 پاسيەنتتەن قاتەرلى ىسىك انىقتالىپ، ديسپانسەرلىك ەسەپكە الىنعان. قۇرىلىمدىق تۇرعىدان العاندا، ءبىرىنشى ورىندا ءسۇت بەزى وبىرى، ەكىنشى – كولورەكتالدى وبىر، ءۇشىنشى – وكپە وبىرى، ءتورتىنشى ورىندا – اسقازان وبىرى تۇر.
ەستەرىڭىزگە سالا كەتسەك، تۇرعىندار سكرينينگتەن تىركەلگەن ەمحانا ارقىلى وتەدى. سكرينينگكە ۋچاسكەلىك مەدبيكە شاقىرۋى ءتيىس. جوسپارلى تەكسەرۋدەن وتەتىن جاسقا جەتكەن ازاماتتار ەمحاناعا وزدەرى حابارلاسسا دا بولادى. سونىمەن قاتار، «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستىڭ 87-بابىنا سايكەس، جۇمىس بەرۋشىلەر سكرينيگتەن وتەتىن جۇمىسكەرلەردى ءبىر كۇنگە جۇمىستان بوساتۋعا مىندەتتى.