باكۋدە قازاقستان مەن ءازىربايجاننىڭ ونداعان ءىرى كومپانيالارىن باسىن قوسقان اۋىل شارۋاشىلىعى فورۋمى ءوتتى.
وعان قاتىسقان ازىق-تۇلىك كەلىسىمشارت كورپوراسياسىنىڭ باسقارما ءتوراعاسى اسىلحان دجۋۆاشيەۆ كومپانيانىڭ قىزمەتى جانە ونىڭ استىق تەرمينالدارىنىڭ مۇمكىندىكتەرى تۋرالى ايتىپ بەردى. ول سونداي-اق ءازىربايجانعا ءىرى كولەمدە بيداي جەتكىزۋگە دايىن ەكەنىن اتاپ ءوتتى، دەپ حابارلايدى aqshamnews.kz اۋىل شارۋاشالىعى مينيسترلىگىنە سىلتەمە جاساپ.
ءداندى داقىلدار مەن جۇگەرىنى قابىلداپ-تيەۋ جانە ساقتاۋ «اق بيداي-تەرمينال» اق ارقىلى جۇزەگە اسىرىلادى. «ازىق-تۇلىك كەلىسىمشارت كورپوراسياسى» ۇك جالعىز اكسيونەرى بولىپ تابىلاتىن كومپانيا قازاقستاندا، ءازىربايجاندا جانە يراندا استىق تەرمينالدارى جۇيەسىن باسقارادى. بۇل اقتاۋ پورتىنداعى تەرمينالدىڭ ءوزى (قازاقستان)، باكۋ استىق تەرمينالى (ءازىربايجان) جانە اميراباد گرەين كيش تەرمينالى (يران).
اسىلحان دجۋۆاشيەۆ استىقتى ساقتاۋ مەن وتكىزۋدىڭ تابىستى جۇمىس ىستەيتىن جۇيەسى ءازىربايجانعا استىق جەتكىزىلىمىن ءتيىمدى جۇزەگە اسىرۋعا مۇمكىندىك بەرەتىنىن اتاپ ءوتتى.
اتاپ ايتقاندا، گوۆسانا پورتىندا ورنالاسقان باكۋ استىق تەرمينالىنىڭ استىقتى قابىلداۋ، تيەۋ بويىنشا وندىرىستىك قۋاتى جىلىنا 600 مىڭ تونناعا جۋىق، ال ديىرمەن كەشەنى جىل سايىن 50 مىڭ تونناعا دەيىن ءونىمدى قايتا وڭدەۋگە قابىلەتتى. تەرمينال تاۋلىك بويى جۇمىس ىستەيدى جانە قىزمەتتەردىڭ جوعارى ساپاسىنا كەپىلدىك بەرەتىن تەحنولوگيالىق پروسەستى باسقارۋدىڭ اۆتوماتتاندىرىلعان جۇيەسىمەن جابدىقتالعان.
«كەزىندە قازاقستان ءازىربايجانعا 1 ملن توننادان استام استىق جونەلتىپ كەلگەن. قازىرگى ۋاقىتتا ءبىز ازەربايجان نارىعىندا قازاقستاندىق بيدايمەن باسەكەگە قابىلەتتى بولۋ ءۇشىن بۇرىنعى پوزيسيالاردى قايتارۋ تەتىكتەرىن پىسىقتاپ جاتىرمىز»، — دەپ ءسوزىن قورىتىندىلادى ازىق-تۇلىك كورپوراسياسىنىڭ باسشىسى.