2023 جىلعى 14 قاراشا باكۋدا قازاقستان، ءازىربايجان جانە وزبەكستان ەكونوميكا جانە ەنەرگەتيكا مينيسترلەرىنىڭ ءۇشجاقتى كەزدەسۋى ءوتتى.
قازاقستان تاراپىنان كەزدەسۋگە ەنەرگەتيكا ءمينيسترى الماسادام ساتقالييەۆ پەن قازاقستاننىڭ ازەربايجانداعى ەلشىسى ءالىم بايەل قاتىستى، دەپ حابارلايدى Almaty-akshamy.kz
كەزدەسۋ بارىسىندا تاراپتار ازەربايجان اۋماعى ارقىلى قازاقستان مەن وزبەكستاننان ەۋروپاعا ەلەكتر ەنەرگياسىن ەكسپورتتاۋ پەرسپەكتيۆالارىن تالقىلادى، سونداي-اق جاسىل ەنەرگەتيكا سالاسىنداعى جوبالاردى دامىتۋ جونىندە پىكىر الماستى. اتاپ ايتقاندا، ءۇش ەلدىڭ جاڭارتىلاتىن ەنەرگيانى دامىتۋ جانە ەكسپورتتاۋ سالاسىنداعى مەملەكەتتىك ساياساتى ازەربايجانعا ورتالىق ازيادان ەۋروپاعا ەلەكتر ەنەرگياسىن جەتكىزۋدە بايلانىستىرۋشى كوپىر ءرولىن اتقارۋعا مۇمكىندىك بەرەتىنىنە نازار اۋدارىلدى.
وسى تۇرعىدا ازەربايجان گرۋزيا، رۋمىنيا جانە ۆەنگريامەن بىرلەسىپ، كاسپيي – قارا تەڭىز – ەۋروپا ەكسپورت ءدالىزىن قۇرۋ بويىنشا جۇمىس جۇرگىزىپ جاتقانىن اتاپ وتكەن ءجون، ونىڭ اياسىندا 4 گۆت ەلەكتر ەنەرگياسىن ەكسپورتتاۋ جوسپارلانۋدا. ناحچىۆان – تۇركيا – ەۋروپا باعىتى بويىنشادا 1 گۆت-تان استام جاسىل ەنەرگيانى جەتكىزۋ جوسپارلانۋدا.
قازاقستان مەن وزبەكستاننىڭ وسى دالىزدەرگە قول جەتكىزۋى ەلەكتر ەنەرگياسى نارىقتارىن ودان ءارى دامىتۋعا، جاسىل سۋتەگى مەن اممياك ءوندىرۋ جانە جەتكىزۋ سالاسىنداعى ىنتىماقتاستىقتى نىعايتۋعا، ەنەرگەتيكالىق قاۋىپسىزدىكتى نىعايتۋعا جانە ورتا ءدالىز اياسىندا جاسىل جوبالاردى دامىتۋعا وڭ ىقپال ەتەدى.
كەزدەسۋدە قازاقستان مەن وزبەكستاننىڭ ەنەرگەتيكالىق جۇيەلەرىن ازەربايجاننىڭ ەنەرگەتيكالىق جۇيەسىمەن بىرىكتىرگەننەن كەيىن كاسپيي تەڭىزىنىڭ تۇبىمەن جوعارى ۆولتتى جەلىلەردى تارتۋ مۇمكىندىكتەرى تۋرالى پىكىر الماسۋ بولدى.
كەلىسسوزدەر ناتيجەسىندە جوبانىڭ تەحنيكالىق-ەكونوميكالىق نەگىزدەمەسىن دايىنداۋ جانە ەلەكتر ەنەرگياسىن ەكسپورتتاۋ بويىنشا بىرلەسكەن كاسىپورىن قۇرۋ تۋرالى ۋاعدالاستىققا قول جەتكىزىلىپ، ءتيىستى بىرلەسكەن كومميۋنيكەگە قول قويىلدى.
وسى تۇرعىدا بيىل قازاقستان مەن ازەربايجان كاسپيي تەڭىزىنىڭ تۇبىمەن ايماقتاعى ينتەرنەت-ترافيكتى ءارتاراپتاندىرۋعا مۇمكىندىك بەرەتىن تالشىقتى-وپتيكالىق بايلانىس جەلىسىن تارتۋ بويىنشا بىرلەسكەن جوبانى جۇزەگە اسىرۋدى باستاعانىن ايتا كەتكەن ءجون.