ناقتى تولەۋشىلەر 5 ميلليونعا جۋىق.
ەندى حالىقتى ءمامس جۇيەسىنە تارتۋ ءۇش باعىتتا جۇرگىزىلەدى، دەپ حابارلايدى Almaty-akshamy.kz دەنساۋلىق ساقتاۋ مينيسترلىگىنە سىلتەمە جاساپ.
قازاقستاندا حالىقتى الەۋمەتتىك مەديسينالىق ساقتاندىرۋعا تولەم جاساتۋ ءۇشىن شارالار ازىرلەندى.
قازاقستاندا مىندەتتى الەۋمەتتىك مەديسينالىق ساقتاندىرۋعا جارنالار مەن اۋدارىمدار جاسايتىن حالىق سانى تىم از، ناقتى تولەۋشىلەر 5 ميلليونعا جۋىق نەمەسە 25%-تەن اسپايدى. مينيسترلىكتىڭ ايتۋىنشا، كەيبىر وبلىستاردا مەديسينالىق الەۋمەتتىك ساقتاندىرۋعا تولەم جاسايتىندار سانى ءتىپتى بەستەن بىرگە دە جەتپەيدى. ال 15 جەڭىلدىكتى ساناتتاعى 11،7 ميلليون ازامات مەديسينالىق قىزمەتتى مەملەكەت ەسەبىنەن ءمامس ارقىلى الادى.
وسى ورايدى، الەۋمەتتىك مەديسينالىق ساقتاندىرۋعا تولەم جاسايتىندار سانىن ۇلعايتۋ ءۇشىن دەنساۋلىق ساقتاۋ مينيسترلىگىنىڭ جانىنان ۆەدومستۆوارالىق جوبالىق وفيس قۇرىلدى. ەندى حالىقتى ءمامس جۇيەسىنە تارتۋ ءۇش باعىتتا جۇرگىزىلەدى.
"ءبىرىنشىسى - قاناعاتتانارلىقسىز، داعدارىستىق جانە توتەنشە جاعدايداعى ازاماتتارعا قاتىستى جۇمىس. بۇگىنگى تاڭدا مۇنداي ساناتتاعى ادامدار سانى 2،2 ملن. جەرگىلىكتى اتقارۋشى ورگانداردىڭ جانىنداعى شتابتار ەكونوميكالىق بەلسەندى جانە ەڭبەككە جارامسىز ادامداردى انىقتاۋى ءتيىس. بۇدان باسقا، وسال ساناتتاعى ادامدار ءۇشىن ءمامس جارنالارىن تولەۋ تەتىگى ماسەلەسى پىسىقتالاتىن بولادى. ونى جەرگىلىكتى اتقارۋشى ورگان انىقتايدى"، - دەيدى ۆەدومستۆو.
ەكىنشى باعىت - جەرگىلىكتى اتقارۋشى ورگانداردىڭ مەملەكەتتىك كىرىستەر ورگاندارىمەن ءوزارا ءىس-قيمىلى ارقىلى بەيرەسمي جۇمىسپەن قامتىلعان حالىقتى تارتۋ. ولاردىڭ كاسىپكەرلىك قىزمەتىندە ءمامس تولەۋدى بارىنشا انىقتالاتىن بولادى.
"ءۇشىنشى باعىت – ءمامس بويىنشا تولەمدەردى ۋاقتىلى جۇرگىزبەيتىن جۇمىس بەرۋشىلەرمەن مەملەكەتتىك كىرىستەر ورگاندارىنىڭ جۇمىسىن جانداندىرۋ. مۇندا ءبىز الەۋمەتتىك مەديسينالىق ساقتاندىرۋ جۇيەسىندەگى بورىشكەر ۇيىمدار تۋرالى ايتىپ وتىرمىز"، - دەدى مينيسترلىك.
بۇل تاجىريبە قالالىق جانە اۋداندىق دەڭگەيدە جۇرگىزىلەتىن بولادى.