ق ر جوعارعى سوتىنىڭ 2025 جىلعى 6 ناۋرىزداعى قاۋلىسىمەن «ازىق-تۇلىك كەلىسىم-شارت كورپوراسياسى» ۇك» اق ۇيىمداستىرعان تەندەر قورىتىندىسى زاڭسىز دەپ تانىلىپ، كومپانياعا ونى قايتا قاراۋ مىندەتتەلدى. ءىس «كاسپيي» تاۋار بيرجاسى» اق-نىڭ شاعىمى نەگىزىندە قارالعان.
داۋدىڭ ءمانى – 2024 جىلعى 24 ساۋىردە جاريالانعان تەندەردە استىقپەن بيرجالىق ساۋدا-ساتتىقتى ۇيىمداستىرۋ قىزمەتتەرىن ساتىپ الۋ ناتيجەسى. بۇل تەندەردە «كاسپيي» بيرجاسى» اق-نىڭ ءوتىنىمى قابىلدانباي، جەڭىمپاز رەتىندە «ەۋرازيالىق ساۋدا جۇيەسى» (ەسج) بيرجاسى تاڭدالعان بولاتىن. جوعارعى سوت اتالمىش شەشىمدە زاڭ تالاپتارىنىڭ بۇزىلعانىن، اتاپ ايتقاندا ءوتىنىمنىڭ رەسمي ەمەس نەگىزدەر بويىنشا قابىلدانباعانىن انىقتادى.
سوت شەشىمى بويىنشا ازىق-تۇلىك كورپوراسياسى ءبىر اي ىشىندە تەندەر ناتيجەلەرىن جوعارعى سوتتىڭ قۇقىقتىق ۇستانىمىن ەسكەرە وتىرىپ قايتا قاراۋى ءتيىس. سونىمەن قاتار، تالاپكەردىڭ پايداسىنا مەملەكەتتىك باج سالىعى دا ءوندىرىلدى.
ايتا كەتەيىك، بۇعان دەيىن ءساۋىر ايىندا مەملەكەتتىك رەزەرۆتەن بيداي ساتۋ ەسج بيرجاسىندا جالعاسىپ جاتقاندىعى جونىندە اقپارات تاراعان ەدى. بۇل ساۋدا-ساتتىق اتالعان سوت پروسەسىنە سەبەپ بولعان بولاتىن.
كەرەك دەرەك
«كاسپيي» تاۋار بيرجاسى» اق – مۇناي ونىمدەرى، كومىر، سەمەنت جانە وزگە دە تاۋارلارمەن ساۋدا جاساۋعا ماماندانعان قازاقستاننىڭ جەتەكشى بيرجالىق الاڭى. بيرجا EUROPEX – ەۋروپالىق ەنەرگەتيكالىق بيرجالار قاۋىمداستىعىنىڭ مۇشەسى، S&P Global رەيتينگ اگەنتتىگىنەن ەڭ جوعارى ESG باعاسىن العان، بۇۇ جاھاندىق شارتىنىڭ تولىققاندى قاتىسۋشىسى. سونىمەن قاتار، KASE قور بيرجاسىنىڭ رەسمي ليستينگىنە ەنگەن قازاقستانداعى جالعىز تاۋار بيرجاسى بولىپ سانالادى.