قازاقستاندا مەملەكەت باسشىسىنىڭ تاپسىرماسىنا سايكەس اۋىلدىق دەنساۋلىق ساقتاۋ جۇيەسىن جاڭعىرتۋعا باعىتتالعان ۇلتتىق جوبا جۇزەگە اسىرىلىپ جاتىر.
جوبانىڭ ماقساتى — مەديسينالىق-سانيتارلىق العاشقى كومەكتى دامىتۋ جانە ينفراقۇرىلىمدى جاڭارتۋ ارقىلى اۋىلدىق جانە شالعاي ەلدى مەكەن تۇرعىندارىن ساپالى مەديسينالىق قىزمەتپەن قامتاماسىز ەتۋ، دەپ حابارلايدى aqshamnews.kz.
ۇلتتىق جوبانىڭ شەڭبەرىندە 655 مساك نىسانىن – دارىگەرلىك امبۋلاتوريا، فەلدشەرلىك-اكۋشەرلىك جانە مەديسينالىق پۋنكتتەر سالۋ جوسپارلانعان. بۇگىنگى كۇنى 473 نىسان پايدالانۋعا بەرىلدى، قالعان 182 نىساندى بيىلعى جىلدىڭ سوڭىنا دەيىن اياقتاۋ كوزدەلگەن.
جاڭا نىساندار توزىعى جەتكەن جانە اپاتتى جاعدايداعى 427 عيماراتتىڭ ورنىنا، مەديسينالىق ينفراقۇرىلىمى جوق نەمەسە جالدامالى عيماراتتاردا ورنالاسقان اۋىلدارداعى 208 نىساننىڭ ورنىنا، بۇرىن مۇلدە مەديسينالىق مەكەمە بولماعان جانە ماماندار جۇمىس ىستەمەگەن 20 ەلدى مەكەندە سالىنىپ جاتىر.
سونىمەن قاتار، 32 اۋداندىق اۋرۋحانا اۋدانارالىق اۋرۋحانا دەڭگەيىنە دەيىن جاڭعىرتىلۋدا.
جوبانىڭ شەڭبەرىندە اۋىلدىق مەديسينالىق مەكەمەلەر زاماناۋي دياگنوستيكالىق جانە زەرتحانالىق جابدىقتارمەن، تەلەمەديسينا اپپاراتتارىمەن قامتاماسىز ەتىلەدى. بۇل اۋىل تۇرعىندارىنا ءوز ەلدى مەكەندەرىنەن شىقپاي-اق، بىلىكتى دارىگەرلىك كومەك الۋعا مۇمكىندىك بەرەدى.
جالپى ەل بويىنشا اۋىل تۇرعىندارىنا 3،5 مىڭنان استام فەلدشەرلىك-اكۋشەرلىك جانە مەديسينالىق پۋنكتتى، 1300 دارىگەرلىك امبۋلاتوريانى، 148 ەمحانانى،175 اۋرۋحانانى قوسا العاندا مەديسينالىق كومەك كورسەتەتىن 5 مىڭعا جۋىق دەنساۋلىق ساقتاۋ نىسانى جۇمىس ىستەيدى.