الماتىدا بەلگىلى جۋرناليست باتىر قازىبايەۆ تۋرالى كىتاپتىڭ تۇساۋكەسەرى ءوتتى، - دەپ حابارلايدى aqshamnews.kz ءتىلشىسى.
12 ماۋسىمدا الماتىدا تانىمال جۋرناليست، Alash Media Group حولدينگىنىڭ باسشىسى باتىر قازىبايەۆتىڭ قۇرمەتىنە ارنالعان "وستاتسيا سۆەتوم" اتتى كىتاپتىڭ تۇساۋكەسەرى ءوتتى.
وندا تانىمال مەديامەنەدجەرلەر، جۋرناليستەر مەن تۇلعالار جينالدى. ولاردىڭ قاتارىندا ءلايلا سۇلتان قىزى، زەينەپ احمەتوۆا بار.
بۇل جيناق – باتىر قازىبايەۆتىڭ ءومىرى مەن ەڭبەگى تۋرالى ەستەلىكتەردەن قۇرالعان. كىتاپتىڭ جارىق كورۋىنە ونىڭ وتباسى مۇشەلەرى، اسىرەسە ۇلكەن اپكەسى، جاقىندارى، دوستارى مەن ارىپتەستەرى اتسالىسقان. كىتاپتا باتىر قازىبايەۆتىڭ ءوزى تۇسىرگەن سيرەك ارحيۆ سۋرەتتەر دە بار.
"باتىر نەبارى 53 جىل ءومىر ءسۇردى. ءبىراق ۇزاق ءومىر سۇرگەن دارا تۇلعالارمەن تەڭ دارەجەدە ەڭبەك ەتتى. ونىڭ جۋرناليستيكاداعى وزىندىك ءستيلى بولاتىن. ۇلىمنىڭ ارىپتەستەرى ونىڭ ەڭبەگىن ۇمىتپايدى دەپ سەنەمىن. ەسىمى حالىق جادىندا ساقتالادى"، — دەدى باتىردىڭ اناسى ورىنشا قارابالينا-قازىبايەۆا.
سونداي-اق، ول كىتاپ اۆتورلارىنا جانە ونىڭ جارىق كورۋىنە ۇلەس قوسقان بارشا جانعا العىسىن ءبىلدىردى.
باتىر قازىبايەۆ تۋرالى نە بەلگىلى؟
باتىر قازىبايەۆ – تانىمال قازاق جازۋشىسى ءارى ءجۋرناليسى كاكىمجان قازىبايەۆتىڭ ۇلى. ول ءومىر بويى مەدياسالادا ەڭبەك ەتىپ، Alash Media Group حولدينگىن باسقاردى. بۇل حولدينگ قۇرامىندا Tengrinews.kz، Vesti.kz، Massaget.kz سايتتارى مەن "جۇلدىز FM" جانە "رەترو FM قازاقستان" راديولارى بار. سونىمەن قاتار، ول The Spirit of Tengri ەتنيكالىق مۋزىكا فەستيۆالىنىڭ نەگىزىن قالاعان جانە "جەتىنشى ارنانىڭ" ىرگەتاسىن قالاۋشىلاردىڭ ءبىرى بولعان.
بەلگىلى مەديامەنەدجەر 2022 جىلى ۇزاققا سوزىلعان اۋىر دەرتتەن كەيىن ومىردەن وزدى.