قازاقستان اۋماعىندا دا ۇرىستار بولعانىن كوپشىلىك بىلە بەرمەيدى. ەڭ العاشقى ۇرىستار ەلدىڭ باتىس وڭىرىندە بولعان.
قازىرگى باتىس قازاقستان وبلىسى، بوكەي ورداسى اۋدانىنىڭ تۇرعىندارى سوعىستىڭ زاردابىن تارتتى (ول كەزدە — ورال وبلىسى)، دەپ حابارلايدى aqshamnews.kz مادەنيەت جانە اقپارات مينيسترلىگىنە سىلتەمە جاساپ.
گيتلەر اسكەرى 1942 جىلدىڭ 1 قىركۇيەگىندە ورال قالاسىن باسىپ الۋدى جوسپارلاعان. وسى ساتتەن باستاپ قازاقستان اۋماعىن جاۋلاپ الۋ باستالۋى ءتيىس ەدى.
جانىبەك، سايقىن جانە شونعاي ستانسيالارىن جاۋ اۆياسياسى بومبالادى. بۇل ەلدىمەكەندەردەن نەبارى 80 شاقىرىم قاشىقتىقتا ستالينگراد ءۇشىن قيان-كەسكى شايقاستار ءجۇرىپ جاتقان ەدى. استراحان – ساراتوۆ تەمىر جولىمەن ستالينگراد شايقاسىنا قارۋ-جاراق، جانارماي، دارى-دارمەك جانە اسكەري جابدىق تيەلگەن كولىكتەر تاسىمالداندى. سونىمەن قاتار، وسى شەكارا ماڭىنداعى اۋىلدار قازاقستاننىڭ مۇناي مەن گازعا باي باتىس ايماعىنا (گۋريەۆ وبلىسىنىڭ مۇناي كەن ورىندارىنا) باراتىن ترانزيتتىك نۇكتە بولدى.
فاشيستەردىڭ بۇل وڭىرگە كوز تىگۋىنىڭ تاعى ءبىر سەبەبى – باتىس قازاقستاننىڭ وڭتۇستىك اۋداندارى ارقىلى ستالينگراد مايدانى مەن جوعارعى باس قولباسشى ستاۆكاسى اراسىندا بايلانىس جەلىسى ورناتىلعان. نەمىستەر وسى جەلىنى جويۋ ءۇشىن بار كۇشىن سالدى.
كەيبىر دەرەكتەرگە قاراعاندا، باتىس قازاقستان اۋماعىنا 700-دەن استام بومبا تاستالعان. بومبالاۋدان قازا تاپقان بەيبىت تۇرعىنداردىڭ سانى شامامەن 300 ادامعا جەتكەن. تەمىرجول بويىندا كەمىندە 50 باۋىرلاستار زيراتى بار.