جەكە قۇرام ولاردى پايدالانۋدى وقىپ-ۇيرەندى.
رادياسيالىق، حيميالىق جانە بيولوگيالىق قورعاۋ اسكەرلەرىنىڭ جاراق قۇرامى بيولوگيالىق بارلاۋ ماشينالارىنىڭ زاماناۋي كەشەندەرىمەن تولىقتى، دەپ حابارلادى Almaty-alshamy.kz.
««ءقاۋىپسىز ەل» ۇلتتىق جوباسىن ىسكە اسىرۋ اياسىندا قورعانىس مينيسترلىگى قازاقستان اسكەرىن تەحنيكالىق جانە جاۋىنگەرلىك جاراقتاندىرۋ ماسەلەلەرىن پىسىقتاۋدا. وتاندىق ۇلگىدەگى قارۋ-جاراق ازىرلەۋ باسىم باعىت بولىپ تابىلادى»، - دەلىنگەن مينيسترلىكتىڭ باسپا ءسوز قىزمەتىنىڭ حابارلاماسىندا.
مامانداردىڭ ايتۋىنشا، وتاندىق «وتس NETWORK» كومپانياسى بيولوگيالىق بارلاۋ كەشەندەرىن ازىرلەپ شىعاردى. ولار اسكەرلەردىڭ قاجەتتىلىكتەرىنە قاراي زياتكەرلىك اقپاراتتىق تەحنولوگيالاردى قولدانا وتىرىپ جوبالاندى.
بيولوگيالىق سيپاتتاعى توتەنشە جاعداي اۋماعىنداعى ارنايى تەحنيكا پاتوگەندەردى انىقتاۋ جانە ولاردى شۇعىل تالداۋ ءۇشىن زەرتحانا جاراعىمەن، جەدەل ءتۇسىرىلىم جۇرگىزۋگە قاجەتتى شولۋ بەينەكامەراسىمەن جابدىقتالعان. GPS/گلوناسس تەرمينالىنىڭ بيولوگيالىق زاقىمداۋ ايماقتارىنىڭ دەرەكتەرىن تىركەۋ جانە جەرسەرىكتىك بايلانىس جۇيەسى ارقىلى مالىمەتتەردى جەدەل بەرۋ مۇمكىندىگى بار.
قازىرگى ۋاقىتتا موبيلدىك كەشەندەردى جيناقتاۋ مەن جۇمىسقا قابىلەتتىلىگىن تەكسەرۋ سىناقتارى اياقتالدى. جەكە قۇرام ولاردى پايدالانۋدى وقىپ-ۇيرەندى. جۋىردا ارنايى جابدىق ماقساتقا سايكەس قولدانۋ ءۇشىن اسكەرلەرگە جىبەرىلەدى.
