ەلدە بالالاردىڭ كىتاپ وقۋعا دەگەن قىزىعۋشىلىعىن ارتتىرۋ ءىسى جولعا قويىلعان
2020 جىلى ەلىمىزدە مەملەكەت باسشىسىنىڭ تاپسىرماسى بويىنشا «وقۋعا قۇشتار مەكتەپ» جوباسى باستالدى. وعان مەكتەپ كىتاپحانالارىن كوركەم ادەبيەتپەن قامتاماسىز ەتۋ، وقۋشىلاردى كىتاپ وقۋعا تارتۋ ءۇشىن ءىس-شارالار وتكىزۋ، كىتاپحانالاردا قولايلى جاعداي جاساۋ، جوندەۋ جانە جابدىقتاۋ، كىتاپحاناشىلاردىڭ بىلىكتىلىگىن ارتتىرۋ سياقتى ءبىرقاتار شارالار كىردى.
مەكتەپتەردە كۇن سايىن مىندەتتى تۇردە 20 مينۋت كىتاپ وقۋدى داستۇرگە اينالدىردى. مەكتەپ كىتاپحانالارىنىڭ جانىنان 440 زاماناۋي كوۆوركينگ-ورتالىق اشىلىپ، جۇمىس ىستەپ جاتىر.
كوپتەگەن قازاقستاندىق جوعارى وقۋ ورنى كىتاپحانالارىن اۆتوماتتاندىرادى جانە قايتا جابدىقتايدى. بۇل باعىتتا بەلسەندى جۇمىس ستۋدەنتتەرگە كىتاپ ىزدەۋ جانە الۋ بويىنشا ىڭعايلى سەرۆيس ۇسىنۋ، سونداي-اق كىتاپحاناشىلارعا كىتاپحانا قورىمەن جۇمىس ىستەۋ ءۇشىن ىڭعايلى قۇرال جاساۋ ءۇشىن جۇرگىزىلەدى، دەپ حابارلايدى Almaty-akshamy.kz
بعم باسپا ءسوز قىزمەتىنىڭ حابارلاۋىنشا، بيىل ەلىمىزدە مەكتەپ كىتاپحانالارىنىڭ قورى ەكى ميلليون كوركەم ادەبيەتپەن تولىققان.
ەنگىزىلىپ جاتقان جاڭاشىلدىقتار وقىرمان سانىن ارتتىرۋعا، قىزمەت كورسەتۋ ساپاسىن جاقسارتۋعا جانە جۇمىس ۋاقىتىن قىسقارتۋعا مۇمكىندىك بەردى. مىسالى، جاڭا تەحنولوگيالاردى ەنگىزۋدىڭ جانە جوو-نىڭ قالالىق مەكتەپتەرمەن بەلسەندى جۇمىسىنىڭ ارقاسىندا قاراعاندى تەحنيكالىق ۋنيۆەرسيتەتىندە وقىرمان سانى 17 مىڭعا دەيىن ارتتى.
س.تورايعىروۆ ۋنيۆەرسيتەتىندە ستۋدەنتتەردىڭ كىتاپ وقۋعا دەگەن قىزىعۋشىلىعىن ارتتىرۋ ماقساتىندا كىتاپحانادا اۋدانى 1 560 شارشى مەتر كوۆوركينگ-ورتالىق، كونفەرەنس-زال جانە ستۋدەنتتەرگە ارنالعان دەمالىس ايماعى اشىلدى.
«ءبىلىم جانە عىلىم مينيسترلىگى جوعارى وقۋ ورىندارىنىڭ، مەكتەپتەر مەن كوللەدجدەردىڭ الدىنا ءبىلىم الۋشىلاردىڭ وقۋعا دەگەن قىزىعۋشىلىعىن ارتتىرۋ، مەكتەپتەرمەن جۇمىستى جانداندىرۋ، جاعدايدى جاقسارتۋ جانە قاجەتتى اقپاراتتى ىزدەۋدىڭ ءتيىمدى جولدارىن قامتاماسىز ەتۋ مىندەتىن قويدى. سوندىقتان ءقازىر جوو-لار اۆتوماتتاندىرىلعان جۇيەلەر مەن وزگەرىستەر ەنگىزۋ، تالاپتارعا سايكەس جۇيەلەردى پىسىقتاۋ جانە پەرسونالدى وقىتۋ بويىنشا شارالار قابىلداپ جاتىر. سونىمەن قاتار ۋنيۆەرسيتەتتەر كىتاپحانا قورىن جاڭا باسىلىمدارمەن تولىقتىرىپ جاتىر. ەڭ باستىسى، ۋنيۆەرسيتەت كىتاپحانالارى مەكتەپ وقۋشىلارى ءۇشىن اشىق بولادى. مەديارەسۋرستار سانى دا ارتتى – ەلەكتروندى وقۋلىقتار، ەنسيكلوپەديالار، ادىستەمەلىك قۇرالدار جانە باسقا دا ادەبيەتتەر كوبەيدى. ەلەكتروندىق كىتاپحانالاردىڭ تولىق ءماتىندى جانە مۋلتيمەديالىق رەسۋرستارى، سونىڭ ىشىندە Web of Science جانە Scopus حالىقارالىق بازالارى قولجەتىمدى بولدى. بۇل شارالار ستۋدەنتتەرىمىز ءۇشىن بارلىق جاعدايدى جاساۋ ءۇشىن قابىلدانىپ جاتىر»، – دەدى ءبىلىم جانە عىلىم ۆيسە-مينيسترى قۋانىش ەرعالييەۆ.