قازاقستاننىڭ اسكەري-اۋە كۇشتەرى جاڭا ا-400م اسكەري-كولىكتىك ۇشاعىمەن تولىقتى. بۇل تۋرالى قورعانىس مينيسترلىگى حابارلادى. سالتاناتتى ءراسىم الماتىدا، قورعانىس ءمينيسترى، گەنەرال-پولكوۆنيك رۋسلان جاقسىلىقوۆتىڭ قاتىسۋىمەن ءوتتى. مينيستر قارۋلى كۇشتەردىڭ اۆياتورلارى مەن ءىس-شارا قوناقتارىن ماڭىزدى وقيعامەن قۇتتىقتادى، دەپ حابارلايدى aqshamnews.kz.
مەرەكەلىك ءىس-شاراعا ماڭىزدى قوناقتار قاتىستى
ءىس-شاراعا كەڭەس وداعىنىڭ باتىرى، حالىق قاھارمانى، وتستاۆكاداعى اۆياسيا گەنەرال-مايورى توقتار اۋباكىروۆ، Airbus Military ەۋروپالىق كونسەرنىنىڭ وكىلى ەلەنا پاريييا مارتين، ق ر قارۋلى كۇشتەرىنىڭ ارداگەرى زاپاستاعى پولكوۆنيك ۆلاديمير پلاتوشين، اسكەري-كولىكتىك ەسكادريليانىڭ جەكە قۇرامى، دەسانتتىق-شابۋىلداۋ اسكەرلەرىنىڭ اسكەري قىزمەتشىلەرى، ازاماتتىق اۆياسيا اكادەمياسىنىڭ ستۋدەنتتەرى جانە «جاس سارباز» قوزعالىسىنىڭ تاربيەلەنۋشىلەرى قاتىستى.
ا-400م اسكەري-كولىكتىك ۇشاعىنىڭ ەكيپاجىنىڭ كومانديرى پودپولكوۆنيك اسىلبەك جۇمابايەۆ قورعانىس ءمينيسترى رۋسلان جاقسىلىقوۆقا يسپانيادان تۇراقتى ورنالاسۋ پۋنكتىنە امان-ەسەن كەلگەنى تۋرالى باياندادى. مينيستر بۇل ايتۋلى وقيعاعا قاتىستى قۇتتىقتاۋ ءسوز سويلەپ، زاماناۋي، ۇتقىر، جوعارى تەحنولوگيالىق ارميا ەلدىڭ قاۋىپسىزدىگىن قامتاماسىز ەتۋ مەن قورعانىس قابىلەتىن نىعايتۋدىڭ كەپىلى بولىپ قالا بەرەتىنىن اتاپ ءوتتى.
– مەملەكەتتىك قورعانىس تاپسىرىسى اياسىندا اسكەري-كولىكتىك ۇشاق الىندى. بۇل ۇشاق اۋىر جۇكتەردى تاسىمالداۋ، تەحنيكانى جەتكىزۋ جانە گۋمانيتارلىق وپەراسيالارعا قاتىستى تاپسىرمالاردى ورىنداۋعا ارنالعان، – دەپ مالىمدەدى مينيستر.
Airbus Military كومپانياسىنىڭ وكىلدەرىنە قازاقستاننىڭ اۆياسيالىق ماماندارىن سيەۆيليا قالاسىنداعى اۆياسيالىق دايارلىق ورتالىعىندا وقىتۋعا بەلسەندى قاتىسقانى ءۇشىن مينيستر العىس ءبىلدىردى. ۇشۋ جانە ينجەنەرلىك-تەحنيكالىق قۇرام ارنايى تەوريالىق دايارلىقتان ءوتىپ، اۆياتەحنيكانى باسقارۋ مەن قىزمەت كورسەتۋ بويىنشا قاجەتتى ءبىلىم الدى. سونىمەن قاتار، كومپانيا قازاقستاندىق ماماندارعا قاجەتتى تەحنولوگيالىق اقپاراتتى ۇسىندى، ال بولاشاقتا ولار وسى ۇشاققا ءوز بەتىنشە قىزمەت كورسەتىپ، رەگلامەنتتىك ءىس-شارالاردى جۇرگىزە الادى.
ا-400م اسكەري-كولىكتىك ۇشاعى ءوزىنىڭ تەحنيكالىق سيپاتتامالارىمەن ەرەكشەلەنەدى. بۇل ۇشاق:
- 37 000 كگ جۇكتى تاسىمالداۋعا قابىلەتتى
- ماكسيمالدى جىلدامدىعى 802 كم/ساع
- ۇشۋ بيىكتىگى 12 200 م
- پراكتيكالىق قاشىقتىعى 7870 كم
Airbus Military اۆياجاساۋ كونسەرنىمەن ىنتىماقتاستىق 2013 جىلى باستالىپ، بۇگىندە ەلىمىزدىڭ اسكەري-اۋە كۇشتەرىندە ءساتتى پايدالانىلىپ جۇرگەن س-295 ۇشاقتارىن ساتىپ الۋ ارقىلى نىعايتىلدى. بۇل ىنتىماقتاستىق قازاقستاننىڭ اسكەري كۇشتەرىنىڭ مۇمكىندىكتەرىن ارتتىرىپ، ولاردى زاماناۋي تەحنيكالىق جابدىقتارمەن قامتاماسىز ەتۋدە ماڭىزدى ءرول اتقارادى.
ا-400م اسكەري-كولىكتىك ۇشاعى قازاقستاننىڭ اسكەري-اۋە كۇشتەرىنىڭ الەۋەتىن ارتتىرىپ، اۋىر جۇكتەردى تاسىمالداۋ، تەحنيكانى جەتكىزۋ جانە گۋمانيتارلىق تاپسىرمالاردى ورىنداۋ بويىنشا جاڭا مۇمكىندىكتەر بەرەدى. بۇل ماڭىزدى قادام ەلىمىزدىڭ قورعانىس قابىلەتىن نىعايتىپ، حالىقارالىق اسكەري ىنتىماقتاستىقتى كۇشەيتۋدە زور مانگە يە.