مەملەكەت باسشىسى ۇلتتىق قاۋىپسىزدىك كوميتەتىنىڭ ءتوراعاسى ەرمەك ساعىمبايەۆتى قابىلدادى
قاسىم-جومارت توقايەۆقا ۆەدومستۆونىڭ جىل باسىنان بەرى اتقارعان جۇمىسىنىڭ نەگىزگى قورىتىندىلارى جانە الداعى كەزەڭگە ارنالعان مىندەتتەرى تۋرالى ەسەپ بەرىلدى، دەپ حابارلايدى aqshamnews.kz
ەرمەك ساعىمبايەۆ ۇلتتىق قاۋىپسىزدىك ورگاندارى 4 تەرروريستىك اكتىنىڭ الدىن العانىن حابارلادى. ۇقك مالىمەتىنشە، تەرروريزم مەن ەكسترەميزمگە قاتىسى بار 84 ادام سوتتالعان، 44 ادام ۇستالعان.
لاڭكەستىك سيپاتتاعى قىلمىس جاسادى دەگەن كۇدىكپەن ىزدەۋدە جۇرگەن قازاقستاندىق 6 ازامات سيريا مەن تۇركيادان ەكستراديسيالاندى، ولاردىڭ ەكەۋى سوتتالدى. تەرروريزم مەن ەكسترەميزمگە قاتىسى بار 824 شەتەلدىكتىڭ قازاقستانعا كىرۋىنە جول بەرىلمەدى.
بۇدان بولەك، قاسىم-جومارت توقايەۆقا ىشكى ىستەر مينيسترلىگىمەن بىرگە 19 ۇيىمداسقان قىلمىستىق توپتىڭ اشكەرەلەنگەنى، 60 ادامنىڭ قاماۋعا الىنعانى باياندالدى. زاڭسىز اينالىمداعى 505 اتىس قارۋى، 5 قولدان جاسالعان جارىلعىش قۇرىلعى، 45 جارىلعىش توپتاما جانە 15 046 ءوق-دارى تاركىلەندى.
ەسىرتكى وندىرەتىن 33 زەرتحانا، ونى تاسىمالدايتىن 35 حالىقارالىق جانە 31 وڭىرلىك ارنا جويىلدى. سونداي-اق 3،2 توننا ەسىرتكى قۇرالدارى جانە پسيحوتروپتىق زاتتار، 4،5 توننا كوكنار شيكىزاتى، 18،8 توننا پرەكۋرسورلار تاركىلەندى. ەسىرتكى قۇرالدارى مەن پسيحوتروپتىق زاتتاردىڭ زاڭسىز اينالىمىنا قاتىسى بار 162 ادام سوتتالدى.
ۇقك ءتوراعاسىنىڭ ايتۋىنشا، ەكونوميكالىق قاۋىپسىزدىكتى قامتاماسىز ەتۋ جانە سىبايلاس جەمقورلىققا قارسى ءىس-قيمىل اياسىندا 1،6 تريلليون تەڭگەدەن استام كولەمدە مەملەكەتكە كەلتىرىلەتىن زالالعا توسقاۋىل قويىلدى، بيۋدجەتكە 315 ميلليارد تەڭگە وتەلدى. سىبايلاس جەمقورلىق ارەكەت جاساعانى ءۇشىن 46 ادام سوتتالدى.
مەملەكەتتىك شەكارادا 55 مىڭعا جۋىق قۇقىق بۇزۋشى ۇستالدى، قارۋ مەن ءوق-دارىنى، ەسىرتكى مەن باسقا دا تىيىم سالىنعان زاتتاردى تاسىمالداۋدىڭ 1300-دەن اسا ارەكەتىنىڭ جولى كەسىلدى. شەكارا ارقىلى 18 ميلليارد تەڭگە كولەمىندە ۆاليۋتا مەن قۇنى 66 ميلليارد تەڭگە بولاتىن تاۋارلاردى زاڭسىز وتكىزۋگە جول بەرىلمەدى. زاڭسىز كوشى-قوننىڭ 20 ارناسى توقتاتىلدى.
كوميتەت مەملەكەتتىك ورگانداردىڭ اقپاراتتىق جۇيەلەرىنە 552 ميلليوننان استام كيبەرشابۋىلدى جانە 6 مىڭ DDoS-شابۋىلدى تويتاردى.
پرەزيدەنت كەزدەسۋ سوڭىندا ۇلتتىق قاۋىپسىزدىك ورگاندارى قىزمەتىنىڭ باعىتتارى بويىنشا ءبىرقاتار تاپسىرما بەردى.