قارۋلى كۇشتەردە ماماندىق بويىنشا وقىتۋدىڭ ءبىرىنشى كەزەڭى اياقتالدى.
بۇل ءار وقۋ كەزەڭىنىڭ باسىندا وتكىزىلەتىن اسكەري قىزمەتشىلەردىڭ جاۋىنگەرلىك دايارلىق باعدارلاماسىنىڭ نەگىزگى كەزەڭدەرىنىڭ ءبىرى، دەپ حابارلايدى Almaty-akshamy.kz
اسكەري قىزمەتشىلەردى ماماندىق بويىنشا دايارلاۋ لاۋازىمدىق ماقساتىنا سايكەس وقۋ ساباقتار كەشەنىن قامتيدى. نەگىزگى ماقساتى – شتاتتىق قارۋ-جاراق پەن اسكەري تەحنيكانىڭ فۋنكسيونالدىق مىندەتتەرىن، ماتەريالدىق بولىگىن، ولاردى پايدالانۋ ءتارتىبىن زەردەلەۋ.
جەكە دايىندىق اسكەري بولىمدەردە شتاتتىق-لاۋازىمدىق تاعايىندالۋىنا قاراي تاجىريبەلى نۇسقاۋشىلاردىڭ باسشىلىعىمەن ءبىر اي بويى ىسكە اسىرىلدى. ساباقتار وقۋ-ادىستەمەلىك جانە كورنەكى قۇرالداردى پايدالانا وتىرىپ، قارۋ-جاراق پەن اسكەري تەحنيكادا، وقۋ سىنىپتارى مەن پوليگونداردا وتكىزىلدى.
مەحانيك-جۇرگىزۋشىلەردى، نىساناشى-وپەراتورلاردى، پۋلەمەتشىلەردى، گراناتااتقىشتاردى، وتشاشارشىلاردى جانە بولىمشەلەردىڭ جاۋىنگەرلىك ازىرلىگىن ايقىندايتىن باسقا دا مامانداردى دايارلاۋ ءۇشىن جەكەلەگەن توپتار قۇرىلعان.
بولىمشە كومانديرلەرى ۇرىستى ۇيىمداستىرۋ، وق اتۋدى باسقارۋ، قارۋدى قالىپتى ۇرىس جاعدايىنا كەلتىرۋ، جاۋىنگەرلىك دايارلىق ساباقتارىن وتكىزۋ ادىستەمەسى ماسەلەلەرى بويىنشا وقىدى.
وقۋ اياقتالعاننان كەيىن اسكەري قىزمەتشىلەر باقىلاۋ ساباقتارى بارىسىندا سىناقتار تاپسىرىپ، ناتيجەلەرى بويىنشا ولار شتاتتىق تەحنيكا جانە قارۋ-جاراقپەن جۇمىس ىستەۋگە جىبەرىلدى.
جاۋىنگەرلىك دايارلىقتىڭ كەلەسى كەزەڭىندە اسكەري قىزمەتشىلەر جاۋىنگەرلىك مىندەتتەردى ورىنداۋدا بىرلەسكەن ءىس-قيمىلدارىن پىسىقتاۋعا باعىتتالعان بولىمشەلەردى ۇيلەستىرەتىن بولادى.