اقش-تا دزيۋدودان شەبەرلەر اراسىنداعى الەم چەمپيوناتىندا قورعانىس مينيسترلىگى سپورت كوميتەتىنىڭ ءتوراعاسى – ارميا ورتالىق سپورت كلۋبىنىڭ باستىعى پولكوۆنيك ارمان ابەۋوۆ كۇمىس مەدال جەڭىپ الدى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
Las Vegas World Championships veterans 2024 تۋرنيرىندە 67 ەلدەن مىڭنان استام بالۋان ونەر كورسەتتى. جارىس جەتى سالماق دارەجەسىندە جانە 35 جاستان جوعارى جاس ساناتتارى بويىنشا ءوتتى.
– مۇنداي جارىستارعا ءبىرىنشى رەت قاتىسىپ وتىرعان جوقپىن. ءوز ناتيجەمە ريزامىن. قارسىلاستارىم كۇشتى بولدى. قولداۋ كورسەتكەن وتباسىما، دوستارىم مەن ارىپتەستەرىمە كوپ راحمەت. مۇنداي جارىستارعا قاتىسۋىمنىڭ ماڭىزدى سەبەبى – اسكەري قىزمەتشىلەر مەن ارميا سپورتشىلارىنىڭ كەيىنگى جاس بۋىنىنا ۇلگى كورسەتۋ، – دەدى پولكوۆنيك ارمان ابەۋوۆ.
پولكوۆنيك ارمان ابەۋوۆ 100 كەلىدەن استام سالماق دارەجەسىندە ونەر كورسەتتى. فينالعا بارار جولدا ول برازيليا، پورتۋگاليا، اقش جانە كانادا سپورتشىلارىنان باسىم ءتۇستى. شەشۋشى جەكپە-جەكتە بىلتىرعى الەم چەمپيونى برازيليالىق رەكاردو فەررەيروعا ەسە جىبەردى.
ارميا سپورتشىلارىنىڭ تالىمگەرى، سپورت كوميتەتىنىڭ ءتوراعاسى پولكوۆنيك ارمان ابەۋوۆتىڭ بۇل جەتىستىگى اوسك-نىڭ جەكە قۇرامىنا ەڭ جاقسى ۇلگى بولماق. كلۋب ۇجىمى باسشىسىن تابىستى ونەر كورسەتۋىمەن شىن جۇرەكتەن قۇتتىقتايدى جانە ودان ءارى جەڭىستەر تىلەيدى.