اسحات ايماعامبەتوۆتىڭ ايتۋىنشا، قازاق تىلىندەگى مۋلتفيلمدەر وتە از، ال YouTube سياقتى قولجەتىمدى پلاتفورمالاردا مۇلدە جوقتىڭ قاسى.
دەپۋتات «بالاپان» تەلەارناسىنىڭ كونتەنت جاساۋشىلارعا تولەيتىن قاراجاتى وتە از بولعاندىقتان، ولار تەك قازاق ءتىلىن قولداۋ ماقساتىندا ۆولونتەر سياقتى جۇمىس ىستەپ وتىرعانىن ايتتى، دەپ حابارلايدى aqshamnews.kz
«بۇگىنگى كۇنى بۇل ۇلكەن ماسەلە، ويتكەنى بالالار تەلەديداردان گورى ينتەرنەت پەن YouTube-تى كوبىرەك تاڭدايدى. بالالار «سينيي تراكتور» مەن «ماشا ي مەدۆەد» سياقتى مۋلتفيلمدەرمەن شەكتەلمەي، ساپالى ءارى قىزىقتى قازاقشا مۋلتفيلمدەردى كورۋى ءتيىس» دەدى دەپۋتات تەلەگرام ارناسىندا.
وسى ماقساتتا، كەلەسى جىلدىڭ بيۋدجەت جوباسىن قاراستىرۋ بارىسىندا، قازاق تىلىندەگى مۋلتفيلمدەر جاساۋعا 350 ميلليون تەڭگە ءبولۋدى جانە ولاردىڭ تەك تەلەديدارعا ەمەس، مىندەتتى تۇردە ينتەرنەتكە، سونىڭ ىشىندە YouTube-قا جۇكتەلۋىن قامتاماسىز ەتەتىن نورمانى زاڭعا ەنگىزىلگەن. دەپۋتات بۇل بالالاردىڭ قازاق تىلىندە قىزىقتى كونتەنتكە قول جەتكىزۋ مۇمكىندىگىن كەڭەيتەدى دەپ سەنەدى.
«ماسەلەن، «بالاپان» تەلەارناسىنىڭ كونتەنت جاساۋشىلارعا تولەيتىن قاراجاتى وتە از بولعاندىقتان، ولار تەك قازاق ءتىلىن قولداۋ ماقساتىندا جۇمىس ىستەپ، كوبىنە ۆولونتەر سياقتى ارەكەت ەتەدى. سوندىقتان، وسى بيۋدجەت ارقىلى بولىنگەن قوسىمشا قاراجات قازاقشا كونتەنتتىڭ ساپاسىن ارتتىرۋعا ىقپال ەتەدى دەپ سەنەمىز»، دەدى ول.
دەپۋتات بالالار اراسىندا قازاقشا كونتەنتتى تۇتىنۋ بويىنشا ساپالى عىلىمي زەرتتەۋ جۇرگىزۋ قاجەتتىگىنە نازار اۋداردى. وسىعان بايلانىستى عىلىم مينيسترلىگىنە ءتيىستى ۇسىنىس جاسالعان.
«سونىمەن قاتار، الەمدىك حيت مۋلتفيلمدەردى دە مەملەكەتتىك تىلگە اۋدارىپ، YouTube-قا جۇكتەۋ ماڭىزدى. بۇل ءۇشىن اۆتورلىق قۇقىق يەلەرىمەن اۋقىمدى جۇمىس قاجەت. ازىرگە بۇل ماسەلە تولىق شەشىلگەن جوق، ءبىراق الداعى ۋاقىتتا وسى باعىتتا جۇمىستى جالعاستىرۋدى جوسپارلاپ وتىرمىز»، دەدى ول.