اقش پرەزيدەنتتىگىنە ۇمىتكەرلەر سايلاۋعا ءبىر اپتا قالعاندا ماڭىزدى مالىمدەمەلەر جاسادى، دەپ حابارلايدى aqshamnews.kz
«ءبىر اپتادان كەيىن سىزدە ءوز ومىرىڭىزگە، وتباسىڭىزدىڭ ومىرىنە جانە ءبىز سۇيەتىن ەلدىڭ بولاشاعىنا تىكەلەي اسەر ەتەتىن شەشىم قابىلداۋ مۇمكىندىگى بولادى»، — دەدى اقش ۆيسە-پرەزيدەنتى جانە پرەزيدەنتتىككە ۇمىتكەر كامالا حارريس.
ءحارريستىڭ ايتۋىنشا، الداعى سايلاۋ «ەكى پارتيا مەن ەكى ۇمىتكەر اراسىنداعى تاڭداۋ عانا ەمەس».
«بۇل سايلاۋ ءبىزدىڭ ەلىمىزدىڭ ءاربىر ازاماتى ءۇشىن ەركىندىككە نەگىزدەلگەن ەل بولا ما، الدە حاوس پەن الاۋىزدىق بيلىك ەتە مە دەگەن شەشىم. ۋاقىت جاڭا بۋىن امەريكاندىق كوشباسشىلاردىڭ كەلۋىن تالاپ ەتەدى»، — دەپ قوستى حارريس.
ءحارريستىڭ شتابىنىڭ باعالاۋى بويىنشا، ميتينگىگە 75 مىڭنان استام ادام جينالدى.
ال دونالد ترامپ وتكەن جەكسەنبىدە اۋقىمدى ميتينگ وتكىزدى، ول مانحەتتەننىڭ جۇرەگىندەگى ايگىلى مەديسون-سكۆەر-گاردەن ارەناسىندا سويلەدى. ونى قولداۋعا ميللياردەر يلون ماسك جانە باسقا تانىمال تۇلعالار كەلدى.
«ەگەر مەن سايلاۋدا جەڭىسكە جەتسەم، ءبىز الەم تاريحىنداعى ەڭ قۋاتتى ەكونوميكانى تەز ارادا قۇرامىز. مەنىڭ وتكەن مەرزىمىمدە ءدال وسىنداي ەكونوميكا بولدى. ءبىز ينفلياسيانى جىلدام جەڭىپ، امەريكانى ەڭ قۋاتتى ەلگە اينالدىرامىز»، — دەدى ترامپ مەديسون-سكۆەر-گاردەندەگى سوزىندە.
ايتا كەتەيىك، فيلادەلفيا يلون ماسككە قارسى سوتقا شاعىم ءتۇسىردى. رەسپۋبليكالىق پارتيا كۇن سايىن ميلليون دوللاردان تاراتقان شتاتتارداعى بۇل ارەكەتتەر پروكۋراتۋرا تاراپىنان «زاڭسىز لوتەرەيالىق سحەما» دەپ اتالدى. فيلادەلفيا پروكۋرورى بۇل ءىستى شتاتتىڭ زاڭناماسىنا سايكەس قوزعادى.