بۇگىن 86 جاسقا قاراعان شاعىندا تانىمال اكتريسا رىمكەش ومارحانوۆا ومىردەن وزدى، - دەپ جازادى aqshamnews.kz ءتىلشىسى.
ونەر يەسى - قازاق تەاتر ونەرىنىڭ ماقتانىشى، قازاقستاننىڭ ەڭبەك سىڭىرگەن قايراتكەرى، "قۇرمەت" وردەنىنىڭ يەگەرى، قاليبەك قۋانىشبايەۆ اتىنداعى قازاق ۇلتتىق مۋزىكالىق دراما تەاترىنىڭ نەگىزىن قالاۋشىلاردىڭ ءبىرى.
قارالى حابار قاليبەك قۋانىشبايەۆ اتىنداعى قازاق ۇلتتىق مۋزىكالىق دراما تەاترىنىڭ رەسمي پاراقشاسىندا جاريالاندى.
"رىمكەش ومارحان قىزىنىڭ ومىردەن وتۋىنە بايلانىستى مارقۇمنىڭ تۋعان-تۋىستارى مەن جاقىندارىنا قايعىرىپ كوڭىل ايتامىز. رىمكەش ومارحان قىزى - جارتى عاسىردان استام ۋاقىتىن ۇلتتىق ساحنا ونەرىنىڭ دامۋىنا ارناعان، 150-دەن اسا ءرولدى سومداپ، قازاق تەاترىنىڭ التىن قورىن بايىتقان دارا اكتريسا. ول قاراعاندى قالاسىنداعى ساكەن سەيفۋللين اتىنداعى تەاتردا شىڭدالىپ، كەيىن ەلورداداعى قاليبەك قۋانىشبايەۆ اتىنداعى قازاق ۇلتتىق مۋزىكالىق دراما تەاترىنىڭ اشىلۋىنا زور ۇلەس قوستى"، - دەلىنگەن اقپاراتتا.
اكتريسا ەڭبەك جولىندا ماقپال (ع. مۇسىرەپوۆ "قوزى كورپەش - بايان سۇلۋ")، تولەگەننىڭ اناسى ("قىز جىبەك")، ءمورجان (م. اۋەزوۆ "قاراگوز")، ەڭلىك ("ەڭلىك-كەبەك")، تاڭقىبيكە ("تۇنگى سارىن")، تولعاناي (ش. ايتماتوۆ "انا-جەر-انا")، كاتەرينا (ا. وستروۆسكيي "نايزاعاي")، دجۋلەتتا (ۋ. شەكسپير "رومەو مەن دجۋلەتتا")، بيعايشا (ت. احتانوۆ "كۇشىك كۇيەۋ")، گاننا (ا. دۋداريەۆ "كەش") سياقتى رولدەردى سومداعان.