ادىلەت مينيسترلىگىنە ءۇش پارتيادان تىركەۋ تۋرالى ءوتىنىم تۇسكەن

ءقازىر پارتيا مۇشەلەرىنىڭ ءتىزىمى تەكسەرىلىپ جاتىر.

ۆەدومستۆو باسشىسى قانات ءمۋسيننىڭ مالىمدەۋىنشە، ءۇش ساياسي پارتيانىڭ تىركەۋ تۋرالى ءوتىنىمى ادىلەت مينيسترلىگىنىڭ قاراۋىندا، دەپ حابارلايدى Almaty-akshamy.kz

«قازىرگى تاڭدا ادىلەت مينيسترلىگى ءۇش پارتيادان ءوتىنىم قابىلدادى. ءۇش پارتيا ۇيىمداستىرۋشىلىق، سەزد شاقىرۋ كەزەڭىندە. دۇرىسى، ءبىر پارتيا سەزىن وتكىزىپ قويدى. ءقازىر پارتيا مۇشەلەرىنىڭ ءتىزىمى تەكسەرىلىپ جاتىر. ەكى پارتيا سەزد شاقىرۋ ساتىسىندا»، - دەدى مۋسين.

ايتۋىنشا، جالپى سەگىز پارتيا ادىلەت مينيسترلىگىنە ءوتىنىم بەرگەن، ءبىراق ازىرگە ولار ءبىرىنشى كەزەڭنەن وتكەن جوق.

ايتا كەتەرى، بۇگىن ءماجىلىس ساياسي پارتيالاردى تىركەۋ تارتىبىنە قاتىستى تۇزەتۋلەر ەنگىزىلگەن زاڭ جوباسىن ءبىرىنشى وقىلىمدا ماقۇلدادى.

زاڭ جوباسىنا سايكەس، ساياسي پارتيالاردى تىركەۋ ءۇشىن ونىڭ ساندىق شەگى 20 مىڭنان 5 مىڭعا دەيىن، ساياسي پارتيالاردىڭ وڭىرلەردەگى وكىلدىكتەرىنىڭ سانى 600-دەن 200-گە دەيىن، ساياسي پارتيانى قۇرۋ كەزىندەگى باستاماشىل توپ ازاماتتارىنىڭ سانى 1 مىڭنان 700-گە دەيىن قىسقارتىلادى.