«قازاقفيلم» تۇسىرگەن «اقىن» ءفيلمىنىڭ تۇساۋكەسەرى توكيودا وتەدى

30 قازان مەن 8 قاراشا ارالىعىندا 34ء-شى حالىقارالىق توكيو كينوفەستيۆالى وتەدى

كينوفەستيۆال شەڭبەرىندە بەلگىلى رەجيسسەر دارەجان ومىربايەۆتىڭ «اقىن» ءفيلمىنىڭ الەمدىك دەڭگەيدەگى تۇساۋكەسەرى وتەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

ق ر مادەنيەت جانە سپورت مينيسترلىگى تاپسىرىسى بويىنشا «ۇلتتىق كينونى قولداۋ مەملەكەتتىك ورتالىعى» قولداۋىمەن ش.ايمانوۆ اتىنداعى «قازاقفيلم» اق تۇسىرگەن «اقىن» ءفيلمى ديدار ەسىمدى مويىندالماعان جازۋشىنىڭ ءومىرى تۋرالى باياندايدى.

ءفيلمنىڭ سەنارييى نەمىس جازۋشىسى گەرمان گەسسەنىڭ «اۆتورلىق كەش» جەلىسى بويىنشى جازىلعان. 

«اقىن» ءفيلمى ەڭ الدىمەن وتاندىق كورەرمەندەرگە ارنالعان. وسىنىڭ الدىندا تۇسىرگەن مەنىڭ باسقا فيلمدەرىمە قاراعاندا، بۇل تۋىندىنى مازمۇنى مەن پروبلەماتيكاسى جاعىنان ۇلتتىق كينو دەۋگە بولادى. فيلمدە قازاق ءتىلى مەن ادەبيەتىنە قاتىستى پروبلەمالار كوتەرىلگەن. الايدا بۇل كوپشىلىككە ورتاق ماسەلە، ويتكەنى بۇگىندە قانشاما تىلدەر جويىلىپ بارادى، - دەدى رەجيسسەر دارەجان ومىربايەۆ.

ايتا كەتسەك، 1980 جىلدان بەرى وتكىزىلىپ كەلە جاتقان Tokyo International Film Festival كينوفەستيۆالى - حالىقارالىق كينوپروديۋسەرلەر قاۋىمداستىعى فەدەراسياسىنىڭ (FIAPF) تىركەۋىنەن وتكەن، «ا» ساناتىنداعى الەمدەگى ۇزدىك 15 كينوبايقاۋدىڭ قاتارىنا كىرەتىن بەدەلدى فەستيۆالدەردىڭ ءبىرى.

بيىل فەستيۆالگە قاتىسۋعا 113 ەلدەن 1533 ءوتىنىم كەلىپ تۇسكەن ەكەن. ناتيجەسىندە فەستيۆالدىڭ باستى بايقاۋىنا 15 كينوتۋىندى ىرىكتەلىپ الىنعان، ونىڭ 10 ءفيلمى العاش رەت كورەرمەندەرگە ۇسىنىلاتىن بولادى.

حالىقارالىق قازىلار القاسىن اتى اڭىزعا اينالعان فرانسۋز اكتريساسى يزابەل يۋپپەر باسقارادى. فەستيۆالدىڭ اشىلۋ سالتاناتىندا امەريكالىق رەجيسسەر كلينت يستۆۋدتىڭ «جىگىتتەردىڭ كوز جاسى» اتتى كارتيناسى كورسەتىلەتىن بولادى.