ەلىمىزدە جول قۇرىلىسىنا وتاندىق نانوبيتۋم پايدالانىلادى

وتاندىق ءونىمنىڭ ماڭىزى جوعارى

جول قۇرىلىسىنا وتاندىق نانوبيتۋم قولدانىلادى، دەپ حابارلايدى Almaty-akshamy.kz. Qazaqtv.com cايتىنا سىلتەمە جاساپ.

جول قۇرىلىسىنا ارنالعان قازاقستاندىق نانوتەحنولوگيا ساپاسى جاقسى. وتاندىق عالىمدار ەلىمىزدە جاڭادان توسەلەتىن بيتۋمنىڭ قۇرامىنا كومىردىڭ ۇنتاقتارىن قوسۋدى ۇسىنىپ وتىر.

«بۇل يننوۆاسيالىق ءادىس جولدىڭ فيزيكالىق قاسيەتىن وزگەرتىپ، ساپاسىن ارتتىرۋمەن قاتار وعان جۇمسالاتىن قارجىنى ۇنەمدەيدى»، - دەيدى ونەرتابىس اۆتورلارى.

سەبەبى بىرەگەي ءونىمنىڭ قازاقستاندىق ۇلەسى – 100%. وعان قاجەت قيىرشىق تاس، قۇم، مينەرالدى قوسپالاردىڭ بارلىعى – جەرگىلىكتى شيكىزات.

ولارمەن جاڭادان بىرىگەتىن نانوۇنتاق تا ءوزىمىزدىڭ كەن ورىندارىنان شىققان قاتتى وتىننان الىنادى. ول ءۇش ساتىلى تەحنولوگيامەن ۇساقتالادى.                                  

«ءبىرىنشى مەحانيكالىق ديىرمەندە ۇنتاقتادىق، ودان كەيىن اەروديناميكالىق ادىسپەن، ءۇشىنشى ساتىدا ەلەكتروماگنيتتىك ءورىس ادىسىمەن ۇنتاقتادىق. ءسويتىپ ۇنتاقتالىپ العان نانوۇنتاقتى بيتۋمعا قوستىق. وسى جەردە كولەمدى تاجىريبە جۇرگىزدىك. ياعني 0،5% بيتۋمنىڭ سالماعى بويىنشا 2% دەيىن قوستىق. 0،5% قوسقاننىڭ وزىندە جاقسى ناتيجەگە جەتتىك. ال 2% قوسقان كەزدە ناتيجەمىز وتە جوعارى بولدى. وسىلاي تۇڭعىش رەت قازاقستاندا وتاندىق نانوبيتۋم الدىق»، - دەدى «قازجول عزي» اق پرەزيدەنتى باعدات تەلتايەۆ.