انيماتورلار شەتەلدىك مامانداردان ءدارىس الادى
«قازاقفيلم» كينوستۋدياسىنىڭ بازاسىندا «قازاقانيماسيا» شىعارماشىلىق بىرلەستىگى قۇرىلادى، دەپ حابارلايدى Almaty-akshamy.kz. بۇل تۋرالى مادەنيەت جانە سپورت ءمينيسترى داۋرەن ابايەۆ ءوزىنىڭ Facebook پاراقشاسىندا جازدى.
«وزدەرىڭىزگە بەلگىلى، جاس ۇرپاق تاربيەسى انيماسيامەن تىعىز بايلانىستى. قازىرگى تاڭدا بۇلىدىرشىندەرىمىز باتىستان ۇزدىكسىز كەلىپ جاتقان شەتەلدىك ونىمدەردى قاراپ، تىلىمىزگە دە، دىلىمىزگە دە قايشى مۋلتفيلمدەردى كوپتەپ كورىپ جاتقانى جاسىرىن ەمەس»،- دەدى ول.
جىل سوڭىنا دەيىن بىرلەستىك ون پيلوتتىق جوبانى ۇسىنادى، ال تالانتتى جاس انيماتورلار شەتەلدىك مامانداردان ارنايى ءدارىس الادى.
«ءبىز وسى جۇمىستار ارقىلى ۇلتتىق انيماسيانىڭ باسەكەگە قابىلەتتىلىگىن ارتتىرىپ، ول ونىمدەردى ۇلكەن پروكاتقا شىعارۋدى جوسپارلايمىز. زامان كوشىنەن قالماي، ءبىلىمدى دە بىلىكتى شىعارماشىل جاستارىمىزدى قولداپ، جاڭا يدەيالار مەن تىڭ باستامالارعا ىڭعايلى الاڭ جاساۋىمىز قاجەت. اۋديتوريا سۇرانىسىن قاناعاتتاندىراتىن ساپالى كونتەنت قالىپتاسىرىپ، شەتەلدىك ارىپتەستەرمەن تىعىز بايلانىس نەگىزىندە قازاق انيماسياسىن حالىقارالىق دارەجەگە كوتەرەمىز دەپ سەنەمىن»،- دەدى داۋرەن ابايەۆ.