قۇرمانعازى اتىنداعى قازاق ۇلتتىق كونسەرۆاتورياسىنىڭ 80 جىلدىق مەرەيتويىنا ارنالعان مارافون سالتاناتتى تۇردە باستاۋ الدى.
مەرەكەنىڭ العاشقى ءىس-شاراسى ۇرمەلى مۋزىكا كەشى بولدى، دەپ حابارلايدى aqshamnews.kz مادەنيەت جانە اقپارات مينيسترلىگىنە سىلتەمە جاساپ.
بۇل مۋزىكالىق كەشتە ستۋدەنتتىك ۇجىمدار ونەر كورسەتىپ، كلاسسيكالىق مۋزىكادان باستاپ قازىرگى زامانعا دەيىنگى اسەم اۋەندەرمەن كورەرمەن ىقىلاسىنا بولەندى.
ساحنادا ۇرمەلى اسپاپتاردا ورىندالاتىن ءتۇرلى اۋەندەر ۇسىنىلدى. ونىڭ ىشىندە كەرنەيشىلەر ءانسامبلى، فلەيتاشىلار، كلارنەتشىلەر، ۇرمەلى كۆينتەت جانە ۇرمەلى وركەستر بار. ءاربىر ءنومىردىڭ شابىت پەن شەبەرلىككە تولى ءوز وقيعاسى بولدى.
بۇل كەش ۇرمەلى جانە ۇرمالى اسپاپتار كافەدراسىنىڭ ۇزاق جىلعى ەڭبەگى مەن تاريحىنا جاسالعان قۇرمەت ىسپەتتەس. كافەدرا مۇراسى ونەرگە ادال قىزمەت ەتۋگە باۋلىعان ءتۇرلى بۋىن مۋزىكانتتارىمەن ولشەنەدى.
كەشتىڭ ارنايى قوناعى كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ «دارىن» مەملەكەتتىك سىيلىعىنىڭ لاۋرەاتى قالقامان دۇيسەنبايەۆ جەتەكشىلىك ەتەتىن اعاش ۇرمەلى اسپاپتار كۆينتەتى بولدى.
قالقامان دۇيسەنبايەۆ تا كونسەرۆاتوريانى مەرەيتويىمەن قۇتتىقتاپ، شىعارماشىلىق تابىس تىلەدى.
مەرەيتويلىق مارافون 23 قاراشادان 3 جەلتوقسانعا دەيىن جالعاسادى جانە رەسپۋبليكا سارايىنىڭ ساحناسىندا وتەتىن سالتاناتتى گالا-كونسەرتپەن اياقتالادى. كورەرمەن وسى كۇندەرى تانىمال ۇجىمدار مەن بەلگىلى سوليستەردىڭ، سونداي-اق كونسەرۆاتوريانىڭ دارىندى تۇلەكتەرىنىڭ ونەرىن تاماشالاي الادى.