الماتىدا جىلۋ جەلىلەرىن جوندەۋ سەبەبىمەن رايىمبەك داڭعىلىنىڭ ۋچاسكەسى ءبىر تۇنگە جابىلادى
الماتىنىڭ المالى اۋدانىندا 1994 جىلى پايدالانۋعا ەنگىزىلگەن قۇبىرجولدى جوندەۋ سەبەبىمەن رايىمبەك داڭعىلىنىڭ بويىمەن قوزعالىس ۋاقىتشا شەكتەلەدى، دەپ حابارلايدى aqshamnews.kz.
13 ماۋسىم ساعات 23:00-دەن باستاپ 14 ماۋسىم ساعات 08:00-گە دەيىن رايىمبەك داڭعىلى بويىمەن ن. تىلەندييەۆ كوشەسىنەن برۋسيلوۆسكيي كوشەسىنە دەيىن شىعىس باعىتىندا اۆتوكولىكتەر قوزعالىسى جارتىلاي شەكتەلەدى. باتىس باعىتىنا قاراي قوزعالىس اشىق قالدىرىلادى.
ۋاقىتشا شەكتەۋلەر الداعى جىلىتۋ ماۋسىمىنا دايىندىق اياسىندا، ماگيسترالدى قۇبىر جەلىسىنىڭ جوندەۋ جۇمىستارىن ءقاۋىپسىز جۇرگىزۋدى قامتاماسىز ەتۋ ماقساتىندا ەنگىزىلەدى.
ايتا كەتەيىك، قوزعالىستاردى شەكتەۋگە قاتىستى بارلىق اقپارات Almaty.kz سايتىندا، @AlmatyJoly Telegram-ارناسىندا، اۋداندىق اكىمدىكتەر مەن باسقارمالاردىڭ الەۋمەتتىك جەلىلەرىندە، سونداي-اق «2GIS» جانە «ياندەكس كارتالار» سەرۆيستەرىندە ورنالاستىرىلعان.
ۋاقىتشا قولايسىزدىقتارعا تۇسىنىستىكپەن قاراۋلارىڭىزدى سۇرايمىز!
«الماتى جىلۋ جۇيەسى» ج ش س