ۇلتتىق ۇلاننىڭ الماتىداعى كەڭەس وداعىنىڭ باتىرى، گۆارديا پولكوۆنيگى باۋىرجان مومىش ۇلى اتىنداعى 5571 اسكەري ءبولىمىنىڭ جەكە قۇرامى «قازاق تيتانى» اتانىپ كەتكەن سپورتشى، فايتەر، KINES رەكوردتار كىتابىنىڭ ءۇش دۇركىن رەكوردشىسى المات جۇمانوۆپەن كەزدەستى.
ساربازداردىڭ اقىن-جازۋشىلار، سپورتتاعى چەمپيوندار، ءار سالاداعى ونەر ادامدارىمەن كەزدەسۋى داستۇرگە اينالعان دەۋگە بولادى. اسكەردىڭ وڭ بەينەسىن قالىپتاستىرىپ، اسكەري قىزمەتتىڭ ابىرويىن ارتتىرا تۇسۋگە، كەيىنگى بۋىن جاستاردى وتاندى ءسۇيۋ، قادىرلەۋ، ونى قورعاۋ ءۇشىن دايىن بولۋعا تاربيەلەۋدە سپورت وكىلدەرىنىڭ دە ىقپالى زور ەكەنى ءسوزسىز.
بۇگىن دە وسىنداي جارقىن جۇزدەسۋدىڭ بىرىندە اسكەري قىزمەتشىلەر مەن قازاق تيتانىنىڭ اراسىندا قىزىقتى سۇحبات بولدى. المات جۇمانوۆ – حالىقارالىق دارەجەدە ويىن كورسەتىپ جۇرگەن سپورتشى. ول – ەڭ الدىمەن گەننەن بەرىلگەن تابيعي زور كۇشتىڭ يەسى. ونىڭ تانىمالدىلىعى رەكورد جاساعان سايىن ارتا ءتۇستى. الماتتى قازاقستان عانا ەمەس، شەتەلدەردە دە تانىپ، ونىڭ ەرەكشە قاسيەتى الەمگە ايگىلى بولىپ كەلەدى.
قاجىمۇقاننىڭ بۇگىنگى ىزباسارىمەن جۇزبە-جۇز كەزدەسۋ اسكەري قىزمەتشىلەر ءۇشىن ەرەكشە جاعداي بولدى.
«مەن دە ۇلتتىق ۇلان قاتارىندا بولعان كەشەگى ساربازبىن. 2015 جىلى تەمىرتاۋ قالاسىنداعى 5516 اسكەري بولىمىنە مەرزىمدىك قىزمەتكە شاقىرىلىپ، وتان الدىنداعى بورىشىمدى وتكەردىم. اسكەري قىزمەتتى وتەۋ – ءار ەر-ازاماتتىڭ مىندەتى. مىندەتتەرىڭە ادال بولىڭدار، قاجىماس قايرات، سارقىلماس كۇش-قۋات تىلەيمىن»، – دەپ باستادى اڭگىمەسىن المات جۇمانوۆ. بۇدان كەيىن سپورتشى رەكوردتارى تۋرالى ايتىپ بەردى.
ءبىرىنشى رەكوردىندا 109 توننالىق ۆاگوندى بەلگە بەلبەۋ تاعىپ، 8،5 مەترگە دەيىن سۇيرەگەن، ەكىنشىسىندە ەكى جاسار تۇيەنى يىعىنا سالىپ، ءبىر ۋاقىتتا ارقانمەن ءۇش جەڭىل كولىكتى جۇرگىزۋشىلەرمەن بىرگە 13 مەترگە دەيىن سۇيرەگەن. جالپى سالماق 4800 كگ قۇراعان. ءۇشىنشى رەكوردىندا ان-72 اسكەري ۇشاعىن 1 مەترگە سۇيرەگەن.
قازىرگى ۋاقىتتا المات سپورتتاعى باعىتىن وزگەرتىپ، كاسىپقوي بوكسقا تۇبەگەيلى بەت بۇردى. ناتيجەسى دە جامان ەمەس. 2024 جىلدىڭ 17 جەلتوقسانىندا كاسىپقوي بوكستىڭ UBC CONTINENTAL نۇسقاسى بويىنشا لاتىن امەريكاسىنىڭ چەمپيوندىق بەلبەۋىن جەڭىپ الدى.
كەش سوڭىندا 5571 اسكەري ءبولىمى كومانديرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى پودپولكوۆنيك ۇلىقبەك قارايەۆ «وڭتۇستىك» وڭىرلىك قولباسشىلىعى اتىنان المات جۇمانوۆقا جاستارعا اسكەري-پاتريوتتىق تاربيە بەرۋ ىسىنە قوسىپ جاتقان ۇلەسى ءۇشىن «العىس حات» تابىستادى.