بيىل قوعامدىق-گۋمانيتارلىق باعىتتاعى 6 مىڭ تەرمينگە ساراپتاما جاسالادى.
بۇل جايىندا سەنات دەپۋتاتتارىنىڭ ساۋالىنا بەرىلگەن ق ر پرەمەر-مينيسترىنىڭ ورىنباسارى ەرالى توعجانوۆتىڭ جاۋابىندا ايتىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازاق ءتىلىنىڭ تەرمينولوگيالىق بازاسىن جەتىلدىرۋ بويىنشا جۇمىستار جۇرگىزىلىپ جاتىر. جالپى، 1971 جىلدان بەرى 31 611 تەرمينگە لينگۆيستيكالىق ساراپتاما جاسالعان. بيىل قوعامدىق-گۋمانيتارلىق باعىتتاعى 6 مىڭ تەرمينگە ساراپتاما جاساۋ جوسپارلانۋدا. جاڭا تەرميندەردى بىرىزدەندىرۋ ماقساتىندا «Termincom.kz» قىزمەت ەتەدى. ماقۇلداۋعا ۇسىنىلعان سالالىق تەرميندەردى تەك كوميسسيا مۇشەلەرى عانا ەمەس، سالا ماماندارى مەن جالپى جۇرتشىلىق تالقىلايدى»،- دەپ اتاپ وتەدى ۆيسە-پرەمەر.
ەرالى توعجانوۆ قازاق ءتىلىن ۇلتارالىق قاتىناستار تىلىنە اينالدىرۋ ماقساتىندا جىل سايىن وقىتۋ كۋرستارى مەن ءتۇرلى بايقاۋلار، ىنتالاندىرۋ ءىس-شارالارى ۇيىمداستىرىلىپ كەلە جاتقانىن ايتادى.
«سونىمەن قاتار قازاق ءتىلى ۇلتتىق كورپۋسىنىڭ ماتىندىك بازاسىن قۇرۋ جۇمىسى قولعا الىندى. 2021 جىلى پۋبليسيستيكالىق ماتىندەردەردىڭ 2 ملن بىرلىگىنە تالداۋ جاسالىپ، qazcorpora.kz سايتىنا ورنالاستىرىلدى»، - دەلىنگەن ۇكىمەت باسشىسىنىڭ ورىنباسارىنىڭ جاۋابىندا.