اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە «حالىقارالىق «قازاق ءتىلى» قوعامى» قوعامدىق بىرلەستىگى الماتى قالالىق فيليالىنىڭ كەڭەيتىلگەن وتىرىسى ءوتتى.
جيىن بارىسىندا مەملەكەتتىك ءتىلدىڭ مارتەبەسىن ارتتىرۋ، ونىڭ قوعامدىق ومىردەگى قولدانىسىن كەڭەيتۋ ماسەلەلەرى تالقىلاندى.
وتىرىستى اباي ۋنيۆەرسيتەتىنىڭ باسشىسى، «حالىقارالىق «قازاق ءتىلى» قوعامى» قوعامدىق بىرلەستىگى الماتى قالالىق فيليالىنىڭ ءتوراعاسى بولات تىلەپ اشىپ، قوعامدىق بىرلەستىكتىڭ وبلىستىق جانە رەسپۋبليكالىق ماڭىزى بار قالالىق فيليالدار تۋرالى ەرەجەسىن تالقىلاۋدان باستادى. سونىمەن قاتار، قازاق ءتىلىنىڭ بولاشاعىنا قاتىستى تولعاقتى پىكىرلەرىن ورتاعا سالىپ، انا تىلىمىزگە بايلانىستى جوبالاردى قاعاز جۇزىندە قالدىرماي، ەندىگى جەردە ناقتى ناتيجەلەرگە جەتكىزەتىن ىستەردى قولعا الۋ قاجەتتىگىنە توقتالدى.
– فيليالىمىزدىڭ بۇگىنگى وتىرىسى قازاق ءبىلىمىنىڭ قارا شاڭىراعى – اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە ءوتۋى جايدان جاي ەمەس. سەبەبى، حاكىم ابايدىڭ ەسىمىن يەلەنگەن وقۋ ورنى ءۇشىن مەملەكەتتىك ءتىل ءارقاشان باستى نازاردا تۇرادى. قازاقتىڭ ءبىرتۋار پەرزەنتى احمەت بايتۇرسىن ۇلى العاش ساباق بەرگەن قاسيەتتى وردامىزدا انا ءتىلى ءوز تۇعىرىنان تۇسكەن ەمەس. سوندىقتان الماتى قالاسى – ءعىلىم-بىلىم، مادەنيەت پەن رۋحانياتتىڭ ورتالىعى دەسەك، الىپ شاھارداعى قازاق ءتىلىنىڭ بەدەلى مەن قولدانىس اياسىن كەڭەيتۋ، مەملەكەتتىك ءتىل ساياساتىن ۇزدىكسىز جۇرگىزىپ وتىرۋ ورتاق مۇددەمىز، – دەدى بولات اناپيا ۇلى.
فيليال ءتوراعاسى قازاق ءتىلىن بالاباقشادان باستاپ دارىپتەۋ ماڭىزدىلىعىن ءسوز ەتىپ، بۇلدىرشىندەرگە قازاقشا انيماسيالىق فيلمدەردى كوبىرەك ۇسىنۋ، «قۋىرشاق» تەاترىن مەكتەپكە دەيىنگى مەكەمەلەرگە تارتۋ، مەكتەپتەردە ءتىل ساياساتىن كۇشەيتۋ جونىندە ۇسىنىس ءبىلدىردى. حالىقارالىق «قازاق ءتىلى» مۇرىندىق بولىپ وتىرعان كوپتەگەن جوبا بويىنشا جۇمىس كەستەسىن دە ۇسىندى. بۇل جيىلعان ءتىل جاناشىرلارى تاراپىنان قىزۋ قولداۋ تاپتى.
وتىرىستا ءسوز العان بەلگىلى قوعام قايراتكەرى اسىلى وسمان جاڭا سەرپىن العان «قازاق ءتىلى» قوعامىنىڭ جۇمىسىنا ساتتىلىك تىلەپ، مەملەكەتتىك ءتىلدىڭ مارتەبەسىن كوتەرۋدە وتباسى ينستيتۋتى ءرولىن ارتتىرۋ قاجەتتىگىن ءسوز ەتتى. «مەن ءازىربايجان قىزى بولعاندىقتان، اكەمنىڭ «ۇيدە انا تىلىڭدە، تۇزدە قازاق تىلىندە سويلە» دەگەن ۇستانىمىمەن ءوستىم. نەگە وتباسىلار ءوز بالالارىنا وسىنداي تالاپ قويمايدى؟! اكەمنىڭ سول تاربيەسىنەن جامان بولعان جوقپىن. وسى كۇنگە دەيىن مەنىڭ ءومىرىم مەملەكەتتىك تىلمەن بىتە قايناسىپ كەلەدى. قازاق ءتىلىنىڭ ءوز تۇعىرىنا قونعانىنشا بارىمدى سالامىن» دەگەن ءسوزى كوكىرەگى وياۋ تالاي ازاماتقا وي سالعانى انىق.
بۇدان وزگە ءسوز العان الماتى قالاسى اكىمىنىڭ ادەپ جونىندەگى ۋاكىلى ماماي احەتوۆ، «مەملەكەتتىك ءتىلدى دامىتۋ ينستيتۋتى» ج ش س ديرەكتورى بيجومارت قاپالبەكوۆ، حالىقارالىق «قازاق ءتىلى» قوعامى الماتى قالالىق فيليالى ءتوراعاسىنىڭ ورىنباسارلارى جاناتبەك ىشپەكبايەۆ، نۇربولات نارجانوۆ، قوعامنىڭ الاتاۋ اۋدانىنداعى وكىلى بولات قۇرىمبايەۆ، ت.ب. ازاماتتار قازاق ءتىلىنىڭ مارتەبەسىن ايعايمەن ەمەس، ناقتى ىستەرمەن كوتەرۋ جونىندەگى ويلارىن ورتاعا سالدى.
كەڭەيتىلگەن وتىرىستا اۋدان اكىمدەرى جانە ورىنباسارلارىنىڭ ۇسىنىسىمەن قوعام جۇمىسىن جانداندىرۋ ءۇشىن الماتىنىڭ ءار اۋدانىنان جاۋاپتى تۇلعالار بەكىتىلدى. ولاردى الماتى قالاسى تىلدەردى دامىتۋ جانە ونوماستيكا ءبولىمىنىڭ باسشىسى باقىت ءابيىر ۇلى جەكە-جەكە تانىستىرىپ، قالانىڭ 8 اۋدانىندا اتقارىلىپ جاتقان جۇيەلى شارالار تۋرالى ايتىپ بەردى.
جيىن سوڭىندا «حالىقارالىق «قازاق ءتىلى» قوعامى» قوعامدىق بىرلەستىگى الماتى قالالىق فيليالىنىڭ ءتوراعاسى بولات تىلەپ قاتىسۋشىلاردى مەملەكەتتىك ءتىلدى دامىتۋعا قاتىستى ناقتى ۇسىنىستاردى جازباشا جولداۋعا شاقىرىپ، بارشا ازاماتتاردى قوعامدىق بىرلەستىك جۇمىسىنا جۇمىلا ۇلەس قوسۋعا ۇندەدى.
جۇمىس قورىتىندىسى بويىنشا ءتىل جاناشىرلارى ءداستۇرلى تۇردە كەزدەسىپ، كەشەندى جۇمىستاردى بىرلەسە اتقارۋعا ۋاعدالاستى.