بيىل ەلىمىزدىڭ مەكتەپ وقۋشىلارى العاش رەت ق ر وقۋ-اعارتۋ مينيسترلىگىنىڭ باستاماسىمەن قازاق ءتىلى پانىنەن ەمتيحان تاپسىرۋدا. بۇل جاڭاشىل قادام حالىق تاراپىنان زور قولداۋ تاۋىپ وتىر، سەبەبى ول مەملەكەتتىك تىلگە دەگەن قۇرمەتتىڭ ايقىن كورىنىسى.
قازاق ءتىلى ەمتيحانىنىڭ باستى ماقساتى – ءبىلىم الۋشىلاردىڭ وقۋ باعدارلامالارىن يگەرۋ دەڭگەيىن، وقۋ جانە جازۋ ساۋاتتىلىعىن انىقتاۋ. قالا مەكتەپتەرىنىڭ 5-8 جانە 10 سىنىپ وقۋشىلارى 31 مامىرعا دەيىن بۇل سىناقتان وتەدى. ەمتيحاننىڭ ناقتى ۋاقىتىن ءاربىر وقۋ ورنى ءوزى بەلگىلەيدى، ال ەمتيحان جازباشا جانە اۋىزشا فورماتتا وتكىزىلەدى.
ەمتيحان بارىسىندا وقۋشىلار ەسسە جازۋ، ءماتىندى وقۋ، اڭگىمەلەسۋ جانە ءماتىندى ءتۇسىنۋ بويىنشا ءوز شەبەرلىكتەرىن كورسەتەدى. №98 مەكتەبىندە قازاق جانە ورىس سىنىپتارى بار، سوندىقتان ەمتيحان ەكى تىلدە وتكىزىلەدى.
"تىلگە قۇرمەت – ەلگە قۇرمەت" دەگەن ناقىل ءسوزدى ەسكە الا وتىرىپ، مەكتەپ مۇعالىمدەرى ەمتيحان تاپسىرمالارىن وزدەرى ازىرلەپ، ءبىلىم بەرۋ ۇيىمىنىڭ اكىمشىلىگى بەكىتەدى. ەمتيحاندى مەكتەپ مۇعالىمدەرى وزدەرى قابىلدايدى.
ەمتيحان بارلىق مەكتەپتەردە تاڭەرتەڭگى ساعات 9:00-دە باستالادى. وقۋشىلار سىنىپقا كىرگەندە ۇيالى تەلەفوندارىن تاپسىرىپ، مۇعالىمدەر دايىنداعان بيلەتتەردى الىپ، جاۋاپ بەرۋگە كىرىسەدى.
بۇل باستاما مەملەكەتتىك ءتىلدىڭ مارتەبەسىن ارتتىرۋعا جانە ءبىلىم بەرۋ ساپاسىن جاقسارتۋعا باعىتتالعان ماڭىزدى قادام بولىپ تابىلادى.