قازاق تەڭگەسىن قولدان جاساۋشىلار كوپ پە؟

وتكەن جىلمەن سالىستىرعاندا قولدان اقشا جاساۋشىلار سانى ازايعان.

وسى جىلدىڭ التى ايىندا قازاقستاندا 1 ملن تەڭگەدەن استام سوماعا قولدان جاسالعان 336 اقشا بەلگىسى انىقتالعان، دەپ حابارلايدى Almaty-akshamy.kz.

مامانداردىڭ ايتۋىنشا، بىلتىر وسى ۋاقىتتا وسىنداي 390 بانكنوت اينالىمنان الىنعان بولاتىن.  

«قولدان اقشا جاساۋشىلار كوپ جاعدايدا 2 000 جانە 5 000 تەڭگەلىك كۋپيۋرالاردى جاسايدى. بۇل كۋپيۋرالاردىڭ جالپى ۇلەسى 65% جانە 19% قۇرايدى. قالعان 16%-ى باسقا نومينالداعى بانكنوتتار مەن مونەتالارعا تيەسىلى»، – دەلىنگەن ۇلتتىق بانك باسپا ءسوز قىزمەتىنىڭ حابارلاماسىندا.   

ۇلتتىق بانك ماماندارىنىڭ ايتۋىنشا، جالعان اقشالاردىڭ كوپ بولىگى الماتى (228) مەن نۇر-سۇلتاندا (43) انىقتالدى. 

«قولدان اقشا جاساۋشىلار نەگىزىنەن ۆيزۋالدى قورعانىش ەلەمەنتتەرىن يميتاسيالايدى. ءبىر قاراعاندا، ولار شىن اقشا سياقتى بولۋى مۇمكىن، ءبىراق بانكنوتتى مۇقيات زەردەلەپ كورگەن كەزدە قولدان جاسالعانىن انىقتاي الاسىز. ءتۇپنۇسقا بانكنوتتار ايقىن بەينەلەرىمەن ەرەكشەلەنەدى، اڭىزداعى سامۇرىق قۇسى تۇرىندەگى سۋ بەلگىسى، نومينالى، سونداي-اق جارىق تۇسىرگەن كەزدە انىق كورىنەتىن قورعانىش ءجىبى بار»، – دەيدى ق ر ۇب قولما-قول اقشا اينالىسى دەپارتامەنتى بانكنوتتار مەن مونەتالاردى ساراپتاۋ باسقارماسىنىڭ باسشىسى اسقات مۇقامادييەۆ.