ديماش «سلاۆيان بازارىنىڭ» سالتاناتتى اشىلۋىنا قاتىستى

ديماش ونەرىمەن ءتانتى ەتتى.

«ۆيتەبسكىدەگى سلاۆيان بازارى» XXX حالىقارالىق ونەر فەستيۆالىنىڭ اشىلۋى 15 شىلدەدە قالانىڭ باستى الاڭى – جازعى امفيتەاتردا ءوتتى، دەپ حابارلايدى Almaty-akshamy.kz 24.kz-كە سىلتەمە جاساپ.

بۇل مادەني شارادا ديماش قۇدايبەرگەن «ليۋبوۆ پوحوجايا نا سون» جانە «Be With Me» اندەرىن جاندى داۋىستا ورىنداپ، كورەرمەندەردى قۋانتتى، دەپ جازدى dimashnews.com.

فەستيۆالدىڭ اشىلۋ سالتاناتىندا بەلارۋس پرەزيدەنتى الەكساندر لۋكاشەنكو ءسوز سويلەدى.

«بۇگىنگى ۆيتەبسكىدەگى فەستيۆال – بۇل كاسىبي ۆوكالدىق شەبەرلىكتىڭ بەدەلدى حالىقارالىق بايقاۋى. بۇل ساحنا تايسيا پوۆاليي، رۋسلانا، پەتر ەلفيموۆ، الەنا لانسكايا، ديماش قۇدايبەرگەن جانە باسقا دا كوپتەگەن تانىمال ارتىستەردىڭ جارقىن مانسابىنا باستاۋ بولدى»، – دەپ اتاپ ءوتتى.

الەمنىڭ ءتۇرلى ەلدەرىنىڭ تانىمال ارتىستەرى مەن ۇجىمدارى اۋقىمدى حالىقارالىق ءىس-شاراعا قاتىستى. قوناقجاي امفيتەاتر زالى 7 مىڭ قوناق قابىلدادى. كونسەرت كەزىندە كورەرمەندەر ارتىستەردىڭ ۇسىنعان ءتۇرلى ستيلدەرى مەن جانرلاردىڭ كەرەمەت ۇيلەسىمىن تاڭدانىسپەن قابىلدادى: كلاسسيكالىق، حالىقتىق، ەسترادالىق مۋزىكا ۆيتەبسك ساحناسىندا شىرقالىپ، شىعارماشىلىقتىڭ شەكاراسى مەن قاشىقتىعى جوق ەكەنىن كورسەتتى. حورەوگرافيالىق، سيرك، سپورت ۇجىمدارىنىڭ ونەر كورسەتۋى مەرەكەنىڭ سەرپىندى اتموسفەراسىن جانداندىردى.

«ۆيتەبسكىدەگى سلاۆيان بازارى» XXX حالىقارالىق ونەر فەستيۆالىنىڭ سالتاناتتى اشىلۋ راسىمىنە «سلاۆيان بازارى 2015» جەڭىمپازى، وسى شاراعا شاقىرىلعان قوناق جانە ەسترادالىق اندەر بايقاۋىنداعى قازىلار القاسىنىڭ مۇشەسى ديماش قۇدايبەرگەن قاتىستى. ونىڭ ورىنداۋىندا كونسەرتتىڭ فينالىندا ەكى كومپوزيسيا شىرقالدى – بىرەۋى ورىس تىلىندە، ەكىنشىسى قازاق جانە اعىلشىن تىلدەرىندە. كومپوزيتور يگور كرۋتوي مەن اقىن ۆالەريا گورباچيەۆانىڭ جاۋھارى – «ليۋبوۆ پوحوجايا نا سون» ليريكالىق ءانى كورەرمەندەردى جاعىمدى نوستالگياعا بوي الدىردى.

فەستيۆالگە ءارتۇرلى قالالار مەن ەلدەردەن كەلگەن Dears العاشقى نومىردەن كەيىن ساحناعا ءارتىس ءۇشىن گۇل شوقتارىن اكەلدى. «قىمباتتىلارىم، سۇيىكتى تىڭدارماندارىم! بۇگىن سىزدەردى كورگەنىمە وتە قۋانىشتىمىن. ءدال وسى جەردە وسىدان تۋرا 6 جىل بۇرىن مەن ەرەسەك شىعارماشىلىق ومىرگە جولداما الدىم»، – دەپ ديماش كورەرمەندەرمەن امانداستى. ءارتىس كورەرمەنگە ءوزىنىڭ اتا-اناسىن تانىستىرىپ، جانكۇيەرلەرىمەن بىرگە اناسى سۆەتلانا ايتبايەۆانى تۋعان كۇنىمەن قۇتتىقتادى. «سەنساسيا» شوۋ-بالەتىنىڭ سۇيەمەلدەۋىمەن ءارتىس ورىنداعان ەكىنشى كومپوزيسيا ءانشى جانە كومپوزيتور ديماشتى مۇلدەم باسقا قىرىنان كورسەتتى.

Be With Me كورەرمەندەر زالى مەن شوۋدى تىكەلەي ەفيردە كورىپ وتىرعان ونلاين-اۋديتوريانى قۋاتتاندىرۋ بولدى. ديماش كونسەرتتىڭ سوڭىندا كورەرمەندەر زالىنا ءتۇسىپ، تىڭدارماندارىمەن بىرگە ءان شىرقادى.