مەن – «قازاق ءستيلىمىن». مەنىڭ ءستيلىم باسقاشا - ءالىمحان ۇلى
قازاقستاندىق ورتا سالماقتاعى بوكسشى جانىبەك ءالىمحان ۇلى كوپتەگەن بوكس اۋەسقويلارى مەن جۋرناليستەردىڭ ءوزىن وسى ديۆيزيوندا ونەر كورسەتەتىن وتانداسى گەنناديي گولوۆكينمەن سالىستىراتىندارىنا نارازى ەكەنىن جەتكىزدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بىلعارى قولعاپ شەبەرى بۇل تۋرالى تۆيتتەردەگى جەكە پاراقشاسىنا جازدى. جانىبەكتىڭ ايتۋىنشا، گەناديي ءوز جولىمەن ءجۇرىپ كەلە جاتىر جانە رينگتە ءوزىنىڭ دارالىعىن كورسەتكىسى كەلەدى.
«ءبارى مەنى قازاقستاننىڭ جاڭا گولوۆكينى دەپ ايتادى. مەن بارىنە جاڭا گولوۆكين ەمەس ەكەنىمدى ايتقىم كەلەدى. مەن – جانىبەكپىن. مەن – «قازاق ءستيلىمىن». مەنىڭ ءستيلىم باسقاشا. مەنىڭ وقيعام دا ەرەكشە!» - دەپ جازدى بوكسشى Twitter-گە.
ەسكە سالايىق، جانىبەك ءالىمحان ۇلى كەلەسى ايقاسىن 21 مامىردا لاس-ۆەگاستا وتكىزەدى. ول ورتا سالماقتاعى ۇلىبريتانيا وكىلى دەنني ديگنۋموممەن بوس تۇرعان WBO الەم چەمپيونى تيتۋلى ءۇشىن ايقاسادى.