الەمدەگى ساياسي وقيعالارعا بايلانىستى ۇيىمنىڭ باسشىسى وسىنداي شەشىم قابىلداعان
UFC پروموۋشەنىندە سىنعا ءتۇسىپ جۇرگەن قازاق باھادۇرلەرى بۇدان بىلاي ەلىمىزدىڭ كوك تۋىمەن وكتاگونعا شىعا المايدى، دەپ حابارلايدى Almaty-akshamy.kz Vesti.kz-كە سىلتەمە جاساپ.
جالپى اتالمىش ۇيىمدا قازاقستان اتىنان شىعىپ جۇرگەن وتانداستارىمىز ساۋساقپەن سانارلىق. ولار الەمدەگى ەڭ مىقتى پروموۋشەنىندە العاشقى قادامدارىن ەندى-ەندى جاساپ كەلەدى. كەز-كەلگەن سپورتشى ءۇشىن، سونىڭ ىشىندە قازاق ساربازدارى ءۇشىن حالىقارالىق جارىستاردا كوك تۋمەن شىعۋ اسا ماڭىزدى. سەبەبى ۇلتتىق ناقىشتاعى اتريبۋتيكالارىمىز سپورتشىلارىمىزعا قوسىمشا كۇش بەرەدى. جاۋاپكەرشىلىكتەرى ارتادى.
الايدا بۇدان بىلاي الەمدە بولىپ جاتقان ساياسي وقيعالارعا بايلانىستى ۇيىمنىڭ پرەزيدەنتى دانا ۋايت ليگانىڭ بارلىق سپورتشىسىنا ءوز ەلدەرىنىڭ تۋىمەن وكتاگون ىشىنە اتتاپ باسۋعا رۇقسات بەرمەدى.
جۋىردا رەسەيلىك پەتر يان كەشتىڭ باستى ايقاسىنا شىعار الدىندا رەسەي تۋىنسىز شىقتى. ۇيىمداستىرۋشىلار كوپشىلىك الدىندا ارانداتۋشىلىق بولماسىن دەگەن ويمەن يانعا الدىن الا ەسكەرتۋ جاساعان. ناتيجەسىندە رەسەيلىك سپورتشى تۋسىز شىقتى. سول سەكىلدى ەندى قازاق مما شەبەرلەرى دە ۇلتتىق ناقىشتاعى باس كيىمدەرمەن شىققانىمەن، كوك تۋدى سەگىز بۇرىشقا الىپ كىرە المايتىن بولدى.