سۇمدىق وقيعا وتكەن جىلدىڭ كۇزىندە بولعان
قوستاناي وبلىستىق قىلمىستىق ىستەر بويىنشا مامانداندىرىلعان اۋدانارالىق سوتىندا «كراسنوپارتيزانسكوە» باعباندار قاۋىمداستىعى تۇتىنۋشىلار كووپەراتيۆىنىڭ كۇزەتشىلەرىنە قاتىستى ءىس قارالىپ جاتىر. ولار سارىمساق ۇرلاۋى مۇمكىن دەپ كۇدىكتەنگەن ادامنىڭ باسىن كەسىپ الىپ، ورتەپ جىبەرگەن، دەپ حابارلايدى Almaty-akshamy.kz ازاتتىق رۋحى اقپاراتتىق اگەنتتىگىنە سىلتەمە جاساپ.
Tobolinfo.kzء-تىڭ مالىمەتىنشە، «كراسنوپارتيزانسكوە» باعباندار قاۋىمداستىعى تۇتىنۋشىلار كووپەراتيۆىنىڭ كۇزەتشىلەرى 35 جاستاعى ۆيكتور دياچەنكو مەن 36 جاستاعى اندرەي مارتىنەنكو «ادام ءولتىردى» دەپ ايىپتالۋدا.
بەلگىلى بولعانداي، 2021 جىلدىڭ 5- قىركۇيەگىندە تۇرعىنداردىڭ ءبىرى التى باس سارىمساق ۇرلانعانىن حابارلاعان. ىشىمدىك ىشكەن كۇزەتشىلەر مۇنى «كراسنوپارتيزانسكييدەگى» جەر تەلىمىنىڭ يەسى كۋزوۆ جاساۋى مۇمكىن دەپ كۇدىكتەنگەن. اقىرىندا ولاردىڭ اراسىندا جانجال بولىپ، سوڭى كىسى ولىمىمەن اياقتالدى.
قىلمىسىن جاسىرۋ ءۇشىن ولار كۋزوۆتىڭ دەنەسىن بولشەكتەپ تاستاعان. باسىن ارامەن كەسىپ، ورتەپ، دەنەسىن ءۇيدىڭ اۋلاسىنا كومگەن. الايدا ەكى كۇننەن سوڭ ءمايىتتى قازىپ الىپ، توبىلعا اپارىپ، قامىستىڭ اراسىنا تاستاعان.